លោក Rauf Aregbesola រដ្ឋមន្ត្រីក្រសួងមហាផ្ទៃនីហ្សេរីយ៉ា បានបញ្ជាឱ្យឆ្មាំពន្ធនាគារ “បាញ់សម្លាប់” អ្នកដែលជាប់ពាក់ព័ន្ធក្នុងសកម្មភាពហែកគុករត់គេចខ្លួន។
លោករដ្ឋមន្ត្រីក្រសួងមហាផ្ទៃបានធ្វើអត្ថាធិប្បាយដូចនេះទៅកាន់មន្ត្រីពន្ធនាគារនៅភាគខាងត្បូងនៃទីក្រុង Ibadan ដោយនិយាយថា ជនណាម្នាក់ដែលប៉ុនប៉ងបំពានសន្តិសុខដាច់ខាតមិនអាចនៅមានជីវិត ដើម្បីនិទានរឿងហែកគុកបានទេ។
ក្នុងរយៈពេលមួយឆ្នាំកន្លងទៅនេះ ក្រុមប្រដាប់អាវុធបានវាយប្រហារពន្ធនាគារផ្សេងៗនៅក្នុងប្រទេស ដែលបានអនុញ្ញាតឱ្យអ្នកទោសជាង ៥ ពាន់នាក់រត់គេចខ្លួន។ ឆ្មាំគុកនិងអ្នកជាប់ឃុំមួយចំនួនក៏ត្រូវបានសម្លាប់ផងដែរ។
សកម្មជនសិទ្ធិមនុស្សបានសម្ដែងការព្រួយបារម្ភថា គោលនយោបាយថ្មីអាចនឹងត្រូវរំលោភបំពានដោយកងកម្លាំងសន្តិសុខ។
ប្រព័ន្ធយុត្តិធម៌របស់ប្រទេសនីហ្សេរីយ៉ាមានភាពយឺតយ៉ាវបំផុត ដែលមានន័យថា ប្រហែលបីភាគបួននៃអ្នកទោសជិត ៧ម៉ឺននាក់កំពុងរង់ចាំការកាត់ក្តី។ នេះបើយោងតាមសារព័ត៌មាន BBC។
លោករដ្ឋមន្ត្រីក្រសួងមហាផ្ទៃបាននិយាយថា នេះគ្រាន់តែជាផ្នែកតូចមួយក្នុងការទទួលខុសត្រូវចំពោះការហែកគុកជាញឹកញាប់ ដោយលោកបានសង្កត់ធ្ងន់ថា៖ “រាល់ការប៉ុនប៉ងព្យាយាមបំពានលើស្ថាប័នរបស់យើងគឺមិនអាចទទួលយកបានទេ។ សូមកុំបាញ់ឱ្យរបួស ប៉ុន្ដែសូមបាញ់សម្លាប់”។
គួរបញ្ជាក់ផងដែរថា ការហែកគុកគឺជារឿងធម្មតានៅក្នុងប្រទេសនីហ្សេរីយ៉ា។ កាលពីខែមេសាឆ្នាំមុន អ្នកទោសជាង ១,៨០០នាក់ត្រូវបានដោះលែងដោយខ្មាន់កាំភ្លើង ដែលបានលបចូលវាយប្រហារទីស្នាក់ការប៉ូលីសនៅភាគអាគ្នេយ៍ប្រទេសនីហ្សេរីយ៉ា។ កាលពីខែកញ្ញាកន្លងទៅ អ្នកទោសចំនួន ២៤០ នាក់បានរត់គេចខ្លួន បន្ទាប់ពីខ្មាន់កាំភ្លើងមិនស្គាល់អត្តសញ្ញាណបានវាយប្រហារគុកមួយកន្លែងក្នុងរដ្ឋ Kogi របស់ប្រទេសនីហ្សេរីយ៉ា៕
