អាជ្ញាធរបាននិយាយថា ការធ្លាយប្រេងចេញពីឆ្នេរសមុទ្រប្រទេសប៉េរូបានបង្កឱ្យមាន “គ្រោះមហន្តរាយបរិស្ថាន” ។ រោងចក្រចម្រាញ់ប្រេង La Pampilla របស់ក្រុមហ៊ុន Repsol បានលេចធ្លាយប្រេងជាង ៦,០០០ បារ៉ែល បន្ទាប់ពីកប៉ាល់ដឹកប្រេងមួយគ្រឿងត្រូវបានវាយប្រហារដោយរលកបង្កដោយការរញ្ជួយផ្ទុះភ្នំភ្លើងនៅកោះតុងហ្កាកាលពីថ្ងៃសៅរិ៍។
អាជ្ញាធរបានបិទឆ្នេរចំនួនបីដែលរងការខូចខាតដោយការកំពប់ប្រេង ហើយបាននិយាយថា ពួកគេបានរកឃើញសត្វងាប់ជាច្រើនក្បាលដែលគ្របដណ្ដប់ដោយប្រេង។ មន្ត្រីក្រសួងការបរទេសបានជំរុញឱ្យប្រតិបត្តិកររបស់ក្រុមហ៊ុន Repsol បង់ប្រាក់សំណង។
ក្រសួងបានឱ្យដឹងនៅក្នុងសេចក្តីថ្លែងការណ៍មួយដែលបានបង្ហោះលើប្រព័ន្ធ Twitter ថា៖ “នេះគឺជាគ្រោះមហន្តរាយបរិស្ថានដ៏អាក្រក់បំផុត ដែលបានកើតឡើងនៅជុំវិញទីក្រុង Lima ក្នុងរយៈពេលថ្មីៗនេះ ហើយបានធ្វើឱ្យខូចខាតយ៉ាងធ្ងន់ធ្ងរដល់គ្រួសារអ្នកនេសាទរាប់រយនាក់”។
ក្រសួងបានទាមទារឱ្យក្រុមហ៊ុន Repsol ត្រូវតែទូទាត់សំណងភ្លាមៗសម្រាប់ការខូចខាត។
នាយកផ្នែកទំនាក់ទំនងរបស់ក្រុមហ៊ុន គឺលោកស្រី Tine Van Den Wall Bake បានបដិសេធការទទួលខុសត្រូវចំពោះការលេចធ្លាយនេះ ក្នុងអំឡុងពេលសម្ភាសន៍កាលពីថ្ងៃពុធ ដោយនិយាយថាការធ្លាយប្រេងមានកំណត់។
លោកស្រីបាននិយាយតាមវិទ្យុជាតិកាលពីថ្ងៃពុធថា៖ “យើងមិនបានបង្កឱ្យមានគ្រោះមហន្តរាយបរិស្ថាននេះទេ ហើយយើងមិនអាចនិយាយថា អ្នកណាជាអ្នកទទួលខុសត្រូវដែរ”។
ប៉ុន្តែលោកនាយករដ្ឋមន្ត្រី Mirtha Vásquez ក្រោយមកបានប្រាប់អ្នកសារព័ត៌មានថា ក្រុមហ៊ុនមិនទំនងជាមានផែនការបន្ទាន់ដើម្បីដោះស្រាយជាមួយនឹងការធ្លាយប្រេងដ៏ធំនោះទេ៕
