ក្រុមអ្នកស៊ើបអង្កេតសភាអាមេរិកបានស្នើឱ្យលោកស្រី Ivanka Trump កូនស្រីរបស់លោកអតីតប្រធានាធិបតី ដូណាល់ ត្រាំ ផ្តល់សក្ខីកម្មអំពីហេតុការណ៍កុប្បកម្មថ្ងៃទី៦ ខែមករានៅវិមានកាពីតូលរបស់សហរដ្ឋអាមេរិក។ ការស្នើសុំឱ្យផ្ដល់សក្ខីកម្មពីសមាជិកគ្រួសារលោក Trump បានបង្ហាញពីជំហានដ៏ធំមួយទៀតពីក្រុមអ្នកស៊ើបអង្កេត។
តាមរយៈលិខិតមួយ ប្រធានដឹកនាំកិច្ចការស៊ើបអង្កេត លោក Bennie Thompson បាននិយាយថា លោកស្រី Trump មានវត្តមាននៅទីនោះ នៅពេលដែលឪពុករបស់លោកស្រីត្រូវបានចោទប្រកាន់ថា បានដាក់សម្ពាធលើអនុប្រធានាធិបតីឱ្យច្រានចោលលទ្ធផលបោះឆ្នោត។
មនុស្សមួយក្រុមធំបាននាំគ្នាសម្រុកចូលវិមានកាពីតូល ខណៈដែលសមាជិកសភាបានជួបប្រជុំគ្នា ដើម្បីបញ្ជាក់ពីជ័យជម្នះរបស់លោកប្រធានាធិបតី ចូ បៃឌិន។
លោកស្រី Ivanka Trump កូនស្រីច្បងរបស់លោក ដូណាល់ ត្រាំ បានបម្រើការជាទីប្រឹក្សាជាន់ខ្ពស់ម្នាក់របស់លោករួមជាមួយស្វាមីលោកស្រីគឺ លោក Jared Kushner ក្នុងអំឡុងពេលលោក ដូណាល់ ត្រាំ ធ្វើជាប្រធានាធិបតី។
គណៈកម្មាធិការនេះបានឱ្យដឹងថា លោកស្រីបានចូលរួមក្នុងកិច្ចខិតខំប្រឹងប្រែងដើម្បីបញ្ចុះបញ្ចូលលោក Trump ឱ្យរំសាយក្រុមអ្នកគាំទ្រ ក្នុងអំឡុងពេលមានអំពើហិង្សា។
លិខិតមួយច្បាប់ចំនួនប្រាំបួនទំព័រដែលបានផ្ញើជូនលោកស្រី Trump ពីលោក Thompson សមាជិកសភារដ្ឋ Mississippi បានសរសេរថា៖ “គណៈកម្មាធិការចង់ពិភាក្សាការសន្ទនាផ្សេងទៀតណាមួយ ដែលលោកស្រីប្រហែលជាបានធ្វើជាសាក្សី ឬចូលរួមនៅក្នុងផែនការរបស់លោកប្រធានាធិបតីក្នុងការបំផ្លាញ ឬរារាំងដល់ការរាប់សន្លឹកឆ្នោត”។
លិខិតបានបន្ដថា៖ “សក្ខីកម្ម ដែលទទួលបានដោយគណៈកម្មាធិការ បានបង្ហាញថា សមាជិកនៃបុគ្គលិកសេតវិមានបានស្នើសុំជំនួយរបស់លោកស្រីជាច្រើនលើក ដើម្បីធ្វើអន្តរាគមន៍ក្នុងការបញ្ចុះបញ្ចូលលោកប្រធានាធិបតី ត្រាំ ឱ្យថ្លែងពីភាពគ្មានសណ្ដាប់ធ្នាប់និងអំពើហិង្សា ដែលកំពុងកើតនៅវិមានកាពីតូល”។ លិខិតដដែលនេះបានស្នើឱ្យលោកស្រីចូលផ្ដល់សក្ខីកម្មនៅខែក្រោយ៕
