ក្រសួងការបរទេសសហរដ្ឋអាមេរិកបានបញ្ជាឱ្យសមាជិកគ្រួសារនៃបុគ្គលិកនៅស្ថានទូតអាមេរិកនៅទីក្រុងកៀវ ប្រទេសអ៊ុយក្រែនចាកចេញពីប្រទេស ដោយសារតែការព្រួយបារម្ភពីការឈ្លានពានរបស់រុស្ស៊ីលើអ៊ុយក្រែន។
ក្នុងសេចក្ដីណែនាំមួយកាលពីល្ងាចថ្ងៃអាទិត្យ ក្រសួងនេះក៏កំពុងអនុញ្ញាតឱ្យបុគ្គលិកស្ថានទូតដែលមិនមានភារកិច្ចចាំបាច់ចាកចេញពីប្រទេសអ៊ុយក្រែនផងដែរ។ សេចក្ដីណែនាំរបស់ក្រសួងការបរទេសបានបញ្ជាក់ថា៖ “ដោយសារតែការបន្ដការគំរាមកំហែងនៃសកម្មភាពយោធារុស្ស៊ី ពលរដ្ឋអាមេរិកនៅក្នុងប្រទេសអ៊ុយក្រែនគួរតែពិចារណាចាកចេញឥឡូវនេះដោយប្រើជម្រើសដឹកជញ្ជូនពាណិជ្ជកម្ម ឬឯកជនផ្សេងទៀត”។
បច្ចុប្បន្ន រុស្ស៊ីមានទាហានជាង១០ម៉ឺននាក់ឈរជើងក្បែរព្រំដែនអ៊ុយក្រែន។
នៅក្នុងការហៅទូរស័ព្ទខ្លីមួយ មន្ត្រីជាន់ខ្ពស់ក្រសួងការបរទេសមិនបានបញ្ជាក់ពីហេតុផលណាមួយនៅពីក្រោយការណែនាំថ្មីឱ្យចាកចេញនេះឡើយ ប៉ុន្តែបានសង្កត់ធ្ងន់ម្តងហើយម្តងទៀតលើការលើកឡើងរបស់លោកប្រធានាធិបតី ចូ បៃឌិន កាលពីសប្ដាហ៍មុនជុំវិញលទ្ធភាពនៃការឈ្លានពានរបស់រុស្ស៊ី ដែលអាចកើតឡើងនៅពេលណាមួយ។
ក្រសួងមិនបានបង្ហាញថាមានជនជាតិអាមេរិក ឬបុគ្គលិកស្ថានទូតប៉ុន្មាននាក់នៅអ៊ុយក្រែនទេ។
សេចក្ដីណែនាំបានបន្ដថា៖ “មានរបាយការណ៍ដែលរុស្ស៊ីកំពុងរៀបចំផែនការសកម្មភាពយោធាប្រឆាំងនឹងអ៊ុយក្រែន។ លក្ខខណ្ឌសន្តិសុខ ជាពិសេសនៅតាមព្រំដែនរបស់អ៊ុយក្រែន នៅតំបន់គ្រីមៀដែលកាន់កាប់ដោយរុស្ស៊ី និងនៅភាគខាងកើតដែលគ្រប់គ្រងដោយរុស្ស៊ី គឺមិនអាចទាយទុកជាមុនបានឡើយ ហើយអាចធ្លាក់ចុះខ្លាំងដោយមានការជូនដំណឹងតិចតួច”៕
