គណៈប្រតិភូក្រុមតាលីបង់ ដែលដឹកនាំដោយរដ្ឋមន្ត្រីការបរទេសស្តីទី លោក Amir Khan Muttaqi បានចាប់ផ្តើមកិច្ចពិភាក្សារយៈពេលបីថ្ងៃនៅទីក្រុង Oslo ជាមួយមន្ត្រីរដ្ឋាភិបាលលោកខាងលិច និងតំណាងអង្គការសង្គមស៊ីវិលអាហ្វហ្គានីស្ថាន។
កិច្ចប្រជុំបិទទ្វារនៅទីក្រុងOslo រដ្ឋធានីន័រវេស បានចាប់ផ្តើមនៅថ្ងៃអាទិត្យ ដែលនៅក្នុងកិច្ចប្រជុំនេះមានការចូលរួមពីតំណាងក្រុមតាលីបង់ សកម្មជនសិទ្ធិស្ត្រី និងអ្នកការពារសិទ្ធិមនុស្សមកពីអាហ្វហ្គានីស្ថាន និងពីជនភៀសខ្លួនអាហ្វហ្គានីស្ថាន។
កាសែត Al Jazeera បានរាយការណ៍ថា គណៈប្រតិភូក្រុមតាលីបង់នឹងត្រូវរងសម្ពាធឱ្យសន្យាលើកកម្ពស់សិទ្ធិមនុស្សជាថ្នូរនឹងការទទួលបានជំនួយមនុស្សធម៌រាប់ពាន់លានដុល្លារ។
អ្នកកាសែត Al Jazeera បានរាយការណ៍ពីទីក្រុង Doha ថា កូនអុកដែលលោកខាងលិចមានលើក្រុមតាលីបង់គឺមានតម្លៃជិត ១០ ពាន់លានដុល្លារ ដែលជាទ្រព្យសម្បត្តិរបស់អាហ្វហ្គានីស្ថាន និងត្រូវបានបង្កកនៅសហរដ្ឋអាមេរិក។
លោក Amir Khan Muttaqi រដ្ឋមន្ត្រីការបរទេសស្តីទី នឹងព្យាយាមយកប្រាក់មួយចំនួនមកវិញ ដើម្បីបើកប្រាក់ខែមន្ត្រីរាជការ និងធ្វើឱ្យប្រាកដថា មានអាហារគ្រប់គ្រាន់ក្នុងប្រទេស ព្រោះស្ថានភាពមនុស្សធម៌បាននឹងកំពុងធ្លាក់ចុះយ៉ាងខ្លាំង។
នៅក្នុងដំណើរទស្សនកិច្ចលើកដំបូងរបស់ក្រុមតាលីបង់ទៅកាន់អឺរ៉ុបចាប់តាំងពីការចូលកាន់អំណាចក្នុងខែសីហា ឆ្នាំ២០២១ ក្រុមនេះនឹងជួបជាមួយមន្ត្រីន័រវេស ក៏ដូចជាតំណាងរបស់សហរដ្ឋអាមេរិក បារាំង ចក្រភពអង់គ្លេស អាល្លឺម៉ង់ អ៊ីតាលី និងសហភាពអឺរ៉ុប៕
