ខេត្តបាត់ដំបង! យុវជន០២នាក់បានស្លាប់ភ្លាមៗបន្ទាប់ពីជិះម៉ូតូឡើងជែងមិនប្រយ័ត្ន រ៉េចង្កូចចូលរថយន្តសណ្តោងដឹកទំនិញថៃ។
សមត្ថកិច្ចបានឲ្យដឹងថាករណីគ្រោះថ្នាក់ចរាចរណ៍ខាងលើនេះបានកើតឡើងកាលពីល្ងាចថ្ងៃទី ២៣ ខែមករា ឆ្នាំ ២០២២ នៅតាមបណ្តោយផ្លូវជាតិលេខ ៥៧B ត្រង់ចំណុចមុខផ្សារស្រុកសំពៅលូន ស្ថិតក្នុងភូមិអូរស្ងាត់ ឃុំសន្ដិភាព ស្រុកសំពៅលូន ខេត្តបាត់ដំបង។
ប្រភពនៅកន្លែងកើតហេតុបានប្រាប់ថា នៅមុនពេលកើតហេតុគេឃើញយុវជន០២នាក់បានជិះម៉ូតូមួយគ្រឿងម៉ាកស៊ុយសុគី ពណ៌ស អត់ស្លាកលេខ បើកបរដោយឈ្មោះ ផន ធារ៉ា ភេទប្រុស អាយុ ២០ ឆ្នាំ មានទីលំនៅក្នុងភូមិត្រពាំងព្រលិត ឃុំសន្ដិភាព នឹងអ្នករួមដំណើរជាមួយម្នាក់ទៀត ឈ្មោះ ពេជ្រ សុខុម ភេទប្រុស អាយុ ១៩ឆ្នាំ មានទីលំនៅភូមិតាស្ដា ឃុំតាស្ដា ស្រុកសំពៅលូន ខេត្ដបាត់ដំបង ក្នុងទិសដៅពីកើតទៅលិច លុះទៅដល់ចំណុចកើតហេតុបានឡើងជែងរថយន្ដដឹកទំនិញរបស់ថៃដែលបើកបរក្នុងទិសដៅស្របគ្នា ហើយបានរ៉េចង្កូតដួលចូលទៅនឹងមុខរថយន្ដថៃមួយគ្រឿងផ្សេងទៀតប្រភេទសណ្ដោងរ៉ឺម៉ក ម៉ាកស្គែននា ពណ៌ ស ពាក់ស្លាកលេខ ៧0 -៩២០៣ដែលធ្វើដំណើរបព្ច្រាស់ទិសគ្នាក៏បុកពេញទំហឹងបណ្តាលឲ្យស្លាប់ទាំងពីរនាក់តែម្តង ចំណែកអ្នកបើកបរក្រោយកើតហេតុបានគេចខ្លួនបាត់។
ក្រោយពេលកើតហេតុសមត្ថកិច្ចជំនាញបានចុះពិនិត្យវ៉ាស់វែងរួចប្រគល់សាកសពជនរងគ្រោះអោយទៅសាច់ញាតិយករៀបចំធ្វើបុណ្យតាមប្រពៃណី រីឯមធ្យោបាយបង្កទាំងអស់បានយកទៅរក្សាទុកនៅការិយាល័យចរាចរណ៍ខេត្តរងចាំការដោះស្រាយតាមផ្លូវច្បាប់៕
