ក្រុមតោខៀវ Chelsea កាលពីរាត្រីថ្ងៃអាទិត្យបានយកឈ្នះក្រុមភ្ញៀវ មាន់ខ្នាយមាស Tottenham Hotspur នៅក្នុងទឹកដីStamford Bridge ដោយលទ្ធផល២-០នៅក្របខណ្ឌ Premier Leagueសប្ដាហ៍ទី២៣។
ការប្រកួតកាលពីយប់មិញនេះ ក្រុម Chelsea បានបង្ហាញទម្រង់លេងយ៉ាងល្អ។ ជាក់ស្ដែង ពួកគេមានស្ថិតិគ្រប់គ្រងបាល់បាន៦៦ភាគរយបង្កើតឱកាសស៊ុតបាន១២ជើង ចំគោលដៅ៧ដង សម្រេចទីបាន២គ្រាប់ ចំណែកឯក្រុម Spurs វិញ ស៊ុតបាន៥ជើង ចំគោលដៅ៣លើក ប៉ុន្តែមិនមានសំណាងអាចទម្លុះសំណាញ់ទីក្រុមម្ចាស់ផ្ទះបាននោះទេ។
២គ្រាប់របស់ Chelsea ធ្វើបានដោយកីឡាករ ពីររូបផ្សេងគ្នា ពោលគ្រាប់ទី១ ជាការ ស៊ុតជើងឆ្វេងបញ្ចូលទីយ៉ាងល្អ របស់ខ្សែបម្រើ Hakim Ziyech នៅនាទីទី៤៧ ខណៈគ្រាប់ទី២ ជាការតែតរបស់ខ្សែការពារ Thiago Silva នៅនាទីទី៥៥។
ចំណែកការរកបាន៣ពិន្ទុរបន្ថែមទៀតនេះ ក៏បានជួយអោយក្រុម Chelsea មានសង្ឈឹមក្នុងការប្រជែងយកពាន Premier Leagueវិញដែរ។ ពោលគិតត្រឹមសប្ដាហ៍ទី២៣នេះ ក្រុមតោខៀវ កំពុងឈរលេខ៣ មាន៤៧ពិន្ទុ តាមពីក្រោយក្រុមលេខ២ Liverpool ១ពិន្ទុ និងក្រុមកំពូលតារាង Man City ១០ពិន្ទុ។ សម្រាប់ក្រុម Spurs វិញ ក្រោយចាញ់ប្រកួតនេះ បានធ្លាក់ទៅឈរលេខ៧ មាន៣៦ពិន្ទុ ប៉ុន្តែពួកគេនៅសល់៣ប្រកួតទៀតក្នុងដៃទៀត៕
