នាយកខុទ្ទកាល័យរបស់ប្រទេសទុយនីស៊ី និងជាទីប្រឹក្សាជិតស្និទ្ធបំផុតរបស់ប្រធានាធិបតីរបស់ប្រទេសគឺលោកស្រី Nadia Akacha បានលាលែងពីតំណែងដោយសារតែការ “ខ្វែងគំនិតគ្នា” ជុំវិញផលប្រយោជន៍របស់ប្រទេស។ នេះបើតាមសារដែលលោកស្រីបានបង្ហោះនៅលើប្រព័ន្ធផ្សព្វផ្សាយសង្គម។
កាលពីថ្ងៃចន្ទ លោកស្រីបានសរសេរនៅលើទំព័រហ្វេសប៊ុករបស់ខ្លួនថា៖ “ខ្ញុំបានសម្រេចចិត្តលាលែងពីតំណែងបន្ទាប់ពី ខ្ញុំបានប្រឈមមុខនឹងភាពខុសគ្នាជាមូលដ្ឋាននៃគំនិតទាក់ទងនឹងផលប្រយោជន៍ល្អបំផុតរបស់ទុយនីស៊ី ហើយខ្ញុំគិតថាវាជាកាតព្វកិច្ចរបស់ខ្ញុំក្នុងការដកខ្លួនចេញ”។
មិនមានការអត្ថាធិប្បាយភ្លាមៗឬការបញ្ជាក់ជាផ្លូវការអំពីការលាលែងពីតំណែងរបស់លោកស្រីពីវិមានប្រធានាធិបតីឡើយ។
ប្រភពនយោបាយបានប្រាប់ទីភ្នាក់ងារសារព័ត៌មានរ៉យទ័រថា លោកស្រី Akacha មិនបានយល់ស្របនឹងការគាំទ្ររបស់លោកប្រធានាធិបតី Saied ចំពោះការសម្រេចចិត្តរបស់ក្រសួងមហាផ្ទៃក្នុងការបង្ខំមន្ត្រីសន្តិសុខជាន់ខ្ពស់ចំនួនប្រាំមួយរូប រួមទាំងអតីតប្រធានចារកម្ម ឱ្យចូលនិវត្តន៍ផងដែរ។
លោកស្រី Akacha ត្រូវបានមន្ត្រីរដ្ឋាភិបាលទុយនីស៊ី អ្នកការទូតបរទេស និងអតីតបុគ្គលិកការិយាល័យប្រធានាធិបតីបញ្ជាក់ថា ជាទីប្រឹក្សាជិតស្និទ្ធបំផុត និងគួរឱ្យទុកចិត្តបំផុតរបស់លោក Saied ហើយលោកស្រីជាអ្នកស្ថិតចំចំណុចកណ្ដាលនៅពេលការទំនាក់ទំនងបន្ដទៅលោកប្រធានាធិបតី។
លោកស្រីបានឈរកៀកលោក Saied ចាប់តាំងពីលោកបានឡើងកាន់តំណែងក្នុងឆ្នាំ២០១៩ ក៏ដូចជានៅពេលដែលលោកបានដណ្តើមអំណាចគ្រប់គ្រងនៅចុងខែកក្កដានៅក្នុងព្រឹត្តិការណ៍ ដែលក្រុមប្រឆាំងហៅថា “រដ្ឋប្រហារប្រឆាំងនឹងរដ្ឋធម្មនុញ្ញ”។
លោកប្រធានាធិបតីបានបដិសេធការចោទប្រកាន់រដ្ឋប្រហារ ហើយបានសន្យាថានឹងរក្សាសិទ្ធិ និងសេរីភាពដែលបានទទួលបានមកពីបដិវត្តន៍ឆ្នាំ២០១១របស់ប្រទេសទុយនីស៊ី ដែលបានបង្កឱ្យមានការបះបោរនិទាឃរដូវអារ៉ាប់នៅទូទាំងតំបន់។
ទីប្រឹក្សាជាន់ខ្ពស់មួយចំនួនទៀតក៏បានឈប់ធ្វើការឱ្យលោកប្រធានាធិបតី Saied ចាប់តាំងពីការបោះឆ្នោតរបស់លោកផងដែរ ប៉ុន្ដែពួកគេមិនត្រូវបានជំនួសទាំងអស់ឡើយ៕
