អន្តរជាតិ៖មន្ត្រីយោធាមួយក្រុមបានធ្វើរដ្ឋប្រហារជាក់ស្តែងក្នុងប្រទេសអាហ្រ្វិកខាងលិច, Burkina Fasoខណៈដែលប្រធានាធិបតីលោក Roch Marc Christian Kabore ត្រូវបានឃុំខ្លួនដោយពួកយោធា។មេដឹកនាំនៃចលនាបះបោរបានបង្ហាញខ្លួននៅលើទូរទស្សន៍រដ្ឋកាលពីថ្ងៃចន្ទ។ ពួកគេបានប្រកាសថាពួកគេបានបណ្តេញប្រធានាធិបតី ព្យួររដ្ឋធម្មនុញ្ញ និងរំលាយសភាជាតិ។
មេដឹកនាំបានបញ្ជាក់ថា ពួកគេបានដណ្ដើមអំណាចដោយមិនមានអំពើហិង្សានោះទេ។ ពួកគេបានបន្ថែមថាលោក Kabore ពេលនេះកំពុងស្ថិតនៅកន្លែងដែលមានសុវត្ថិភាព។មន្ត្រីយោធាបាននិយាយថា សកម្មភាពរបស់ពួកគេមានភាពយុត្តិធម៌ ដោយសារតែរដ្ឋាភិបាលមិនអាចកម្ចាត់ក្រុមបះបោរអ៊ីស្លាមនៅក្នុងប្រទេសនេះ។ ពួកគេក៏បាននិយាយដែរថា ស្ថានភាពសន្តិសុខរបស់ប្រទេសកាន់តែអាក្រក់ទៅៗដោយបន្ថែមថា ការដណ្តើមអំណាចនាពេលនេះគឺចាំបាច់ជាងពេលណាណាទាំងអស់ដើម្បីបង្រួបបង្រួមជាតិ។តែយ៉ាងណាក៏ដោយ អគ្គលេខាធិការអង្គការសហប្រជាជាតិ លោក Antonio Guterres បានថ្កោលទោសយ៉ាងខ្លាំងចំពោះការប៉ុនប៉ងកាន់កាប់រដ្ឋាភិបាលដោយពួកយោធានេះ។
លោក Guterres បានអំពាវនាវដល់មេដឹកនាំរដ្ឋប្រហារឲ្យបញ្ឈប់ប្រតិបត្តិការអាវុធ ធានាសុវត្ថិភាពនិងដោះលែងលោកប្រធានាធិបតី Kabore។
លោក Guterres ក៏បានជំរុញឱ្យតួអង្គទាំងអស់អនុវត្តការអត់ធ្មត់ និងជ្រើសរើសយកការសន្ទនា។ លោកបានបន្ថែមថា អង្គការសហប្រជាជាតិគាំទ្រប្រជាជនប្រទេស Burkina Faso ។
សូមជ្រាបថាBurkina Faso មានទីតាំងភូមិសាស្រ្តនៅតំបន់ Sahel ភាគខាងត្បូងនៃវាលខ្សាច់សាហារ៉ា។ ក្រុមអ៊ីស្លាមជ្រុលនិយម បង្កការគំរាមកំហែងយ៉ាងធ្ងន់ធ្ងរដល់សន្តិសុខនៅទីនោះ។មិនតែប៉ុណ្ណោះអស្ថិរភាពនយោបាយបាននិងកំពុងបន្ថែមភាពចលាចលនៅក្នុងប្រទេសនេះ។ រដ្ឋប្រហារយោធាក៏ត្រូវបានធ្វើឡើងក្នុងប្រទេសម៉ាលីដែរក្នុងឆ្នាំ២០២០៕
