សេតវិមានបាននិយាយថា លោកប្រធានាធិបតីសហរដ្ឋអាមេរិក ចូ បៃឌិន នឹងបន្ដគោរពការប្តេជ្ញាចិត្តរបស់លោកក្នុងការធ្វើឱ្យស្ត្រីជនជាតិអាមេរិកដើមកំណើតអាហ្រ្វិកម្នាក់មានវត្តមានក្នុងចំណោមសមាជិកចៅក្រមតុលាការកំពូលទាំង ៩ រូប។
លោកស្រីនឹងចូលជំនួសកន្លែងលោកចៅក្រម Stephen Breyer ដែលត្រូវបានគេរំពឹងថានឹងចូលនិវត្តន៍នៅចុងអាណត្តិក្នុងខែមិថុនាខាងមុខ។ ប៉ុន្ដែ ផែនការចូលនិវត្តន៍របស់លោកចៅក្រមមិនទាន់ត្រូវបានបញ្ជាក់ជាផ្លូវការនៅឡើយទេ។ការផ្លាស់ប្ដូរវត្តមានចៅក្រមថ្មីនឹងមិនប៉ះពាល់ដល់សម្លេងភាគច្រើននៃចៅក្រមអភិរក្សនិយមក្នុងតុលាការឡើយ។
តុលាការកំពូលដើរតួនាទីយ៉ាងសំខាន់ក្នុងជីវិតប្រចាំថ្ងៃរបស់ពលរដ្ឋអាមេរិក ហើយជារឿយៗតែងតែបង្ហាញមុខកាត់សេចក្ដីលើករណីច្បាប់ដែលមានជម្លោះខ្លាំង វិវាទរវាងរដ្ឋនិងរដ្ឋាភិបាលសហព័ន្ធ និងការប្តឹងឧទ្ធរណ៍ចុងក្រោយ ដើម្បីពន្យារពេលការប្រហារជីវិតជាដើម។ចៅក្រមនីមួយៗក្នុងចំណោមចៅក្រមទាំងប្រាំបួនរូបបម្រើការងារពេញមួយជីវិត បន្ទាប់ពីត្រូវបានតែងតាំងដោយប្រធានាធិបតី និងអនុម័តដោយព្រឹទ្ធសភា។
អ្នកនាំពាក្យសេតវិមានលោកស្រី Jen Psaki បានប្រាប់សន្និសីទសារព័ត៌មានថា៖ “លោកប្រធានាធិបតីបានថ្លែង និងបញ្ជាក់ឡើងវិញនូវការប្តេជ្ញាចិត្តរបស់លោកក្នុងការតែងតាំងស្ត្រីស្បែកខ្មៅម្នាក់ឱ្យក្លាយជាសមាជិកចៅក្រមតុលាការកំពូល ហើយនឹងមិនប្ដូរជំហរឡើយចំពោះការសម្រេចចិត្តនេះ”។
គួរបញ្ជាក់ផងដេរថា មានតែបុរសជនជាតិអាមេរិកដើមកំណើតអាហ្រ្វិកពីរនាក់ប៉ុណ្ណោះ ដែលធ្លាប់បម្រើការងារជាចៅក្រមតុលាការកំពូល។ បុរសទាំងពីររូបនោះគឺលោកចៅក្រម Thurgood Marshall (ពីឆ្នាំ១៩៦៧ ដល់ឆ្នាំ១៩៩១) និងលោកចៅក្រម Clarence Thomas ដែលជាអ្នកស្នងតំណែងបន្ដ៕
