សហរដ្ឋអាមេរិកបានគំរាមបញ្ឈប់ដំណើរការប្រព័ន្ធបង្ហូរប្រេងដ៏សំខាន់ ដែលនឹងបញ្ជូនប្រេងពីរុស្ស៊ីទៅកាន់អឺរ៉ុបខាងលិច ប្រសិនបើរុស្ស៊ីឈ្លានពានអ៊ុយក្រែន។ ប្រព័ន្ធ Nord Stream 2 រត់ពីរុស្ស៊ីទៅអាល្លឺម៉ង់ ហើយនៅថ្ងៃព្រហស្បតិ៍ មន្ត្រីនៅទីក្រុងប៊ែរឡាំងបាននិយាយថា ប្រព័ន្ធបង្ហូរប្រេងនេះអាចប្រឈមនឹងទណ្ឌកម្ម ប្រសិនបើរុស្ស៊ីវាយប្រហារ។
សម្ព័ន្ធមិត្តលោកខាងលិចបាននិយាយថា ពួកគេនឹងកំណត់គោលដៅសេដ្ឋកិច្ចរបស់រុស្ស៊ី ប្រសិនបើប្រទេសនេះឈ្លានពាន ហើយការអត្ថាធិប្បាយចុងក្រោយបំផុតបង្ហាញពីការពង្រឹងជំហររបស់ពួកគេលើប្រព័ន្ធបង្ហូរប្រេងដែលរកកម្រៃបាន។
រុស្ស៊ីបដិសេធថា ខ្លួនមិនបានរៀបចំផែនការវាយប្រហារទេ។ ប៉ុន្តែការដាក់ពង្រាយទាហានរុស្ស៊ីរាប់ម៉ឺននាក់នៅតាមព្រំដែនអ៊ុយក្រែនក្នុងប៉ុន្មានសប្តាហ៍ថ្មីៗនេះបានបង្កភាពតានតឹង និងបង្កើនការភ័យខ្លាចចំពោះការឈ្លានពាន។
អ្នកនាំពាក្យក្រសួងការបរទេសសហរដ្ឋអាមេរិក លោក Ned Price បានប្រាប់កាសែត NPR ថា៖ “ខ្ញុំចង់បញ្ជាក់ឱ្យច្បាស់ថា ប្រសិនបើរុស្ស៊ីឈ្លានពានអ៊ុយក្រែនតាមមធ្យោបាយមួយ ឬមធ្យោបាយផ្សេងទៀត ប្រព័ន្ធបង្ហូរប្រេង Nord Stream 2 នឹងមិនមានដំណើរការទៅមុខទេ”។
លោកបានបន្ថែមថា លោកនឹងមិនបញ្ជាក់ឱ្យបានជាក់លាក់ថា តើប្រព័ន្ធនេះនឹងត្រូវបញ្ឈប់ដោយរបៀបណាឡើយ ហើយសំណួរនៅតែចោទសួរថា តើសហរដ្ឋអាមេរិកមានអំណាចក្នុងកិច្ចការនេះទេ។
លោក Price បាននិយាយថា៖ “យើងនឹងធ្វើការជាមួយប្រទេសអាល្លឺម៉ង់ដើម្បីធានាថាប្រព័ន្ធមិនដំណើរការទៅមុខ”។
ខណៈពេលដែលសហរដ្ឋអាមេរិកទទូចថាខ្លួននឹងបញ្ឈប់ការបើកបំពង់បង្ហូរប្រេងទាំងស្រុងនោះ អាល្លឺម៉ង់គ្រាន់តែនិយាយថា ខ្លួននឹងមិនបដិសេធការដាក់ទណ្ឌកម្មលើប្រព័ន្ធនេះទេ។ រដ្ឋមន្ត្រីការបរទេសអាល្លឺម៉ង់លោកស្រី Annalena Baerbock បានប្រាប់សភាថា សម្ព័ន្ធមិត្តលោកខាងលិចកំពុងធ្វើការលើកញ្ចប់ទណ្ឌកម្មដ៏រឹងមាំ ដែលគ្របដណ្តប់ជាច្រើនផ្នែក រួមទាំងប្រព័ន្ធ Nord Stream។ ប៉ុន្តែលោកស្រីបានឱ្យដឹង លោកស្រីមានបំណងចង់បន្តការសន្ទនាជាមួយក្រុងម៉ូស្គូ។
ការអត្ថាធិប្បាយរបស់លោកស្រីបានកើតឡើង បន្ទាប់ពីឯកអគ្គរដ្ឋទូតអាល្លឺម៉ង់ប្រចាំនៅសហរដ្ឋអាមេរិក លោកស្រី Emily Haber បានបង្ហោះសារលើប្រព័ន្ធថ្វីតធ័រថា៖ “គ្មានអ្វីនឹងត្រូវពិចារណាបន្ថែមឡើយ ដោយរួមទាំងប្រព័ន្ធបង្ហូរប្រេង Nord Stream 2 ប្រសិនបើរុស្ស៊ីបានរំលោភលើ អធិបតេយ្យភាពរបស់អ៊ុយក្រែន”៕
