លោកស្រី Xiomara Castro បានស្បថចូលកាន់តំណែងជាប្រធានាធិបតីស្ត្រីដំបូងរបស់ប្រទេសហុងឌូរ៉ាស ចំពេលមានវិបត្តិនយោបាយដែលគំរាមកំហែងដល់ផែនការស្រោចស្រង់ប្រទេសឡើងវិញរបស់លោកស្រី។ ថ្លែងនៅក្នុងពិធីស្បថចូលកាន់តំណែងនេះ មេដឹកនាំឆ្វេងនិយមបាននិយាយថា លោកស្រីកំពុងដឹកនាំប្រទេសដែលបែកបាក់ ប៉ុន្តែបានប្តេជ្ញាបន្តស្វែងរកយុត្តិធម៌សង្គម និងតម្លាភាព។
លោកស្រី Castro អាយុ ៦២ ឆ្នាំបានសន្យាថានឹងដោះស្រាយក្រុមជួញដូរគ្រឿងញៀនដ៏មានឥទ្ធិពល និងដោះស្រាយបញ្ហាច្បាប់រំលូតកូនដ៏តឹងរឹង។ ប៉ុន្តែរបៀបវារៈរបស់លោកស្រីត្រូវបានបំផ្លាញដោយជម្លោះនៅក្នុងគណបក្សរបស់លោកស្រី។
ស្វាមីរបស់លោកស្រី Castro គឺលោក Manuel Zelaya បានគ្រប់គ្រងប្រទេសពីឆ្នាំ២០០៦ ដល់ឆ្នាំ២០០៩ នៅពេលដែលលោកត្រូវបានទម្លាក់ចេញពីអំណាចតាមរដ្ឋប្រហារ។ លោកស្រីបានឈរឈ្មោះជាបេក្ខជនតំណែងកំពូលនេះពីរដងក្នុងរយៈពេលប៉ុន្មានឆ្នាំ បន្ទាប់ពីប្ដីរបស់លោកស្រីត្រូវបានដកចេញពីតំណែងនិងមុនពេលលោកស្រីទទួលបានជ័យជម្នះក្នុងការបោះឆ្នោតកាលពីខែវិច្ឆិកា។
ចាប់តាំងពីពេលនោះមក លោកស្រី Castro បានទទួលរលកនៃការគាំទ្រក្នុងចំណោមសាធារណជន។ ការចូលកាន់តំណែងរបស់លោកស្រីគឺជាការបញ្ចប់អំណាចរយៈពេល ១២ ឆ្នាំរបស់គណបក្សស្តាំនិយម ដែលត្រូវបានញាំញីដោយរឿងអាស្រូវ និងការចោទប្រកាន់ពីអំពើពុករលួយ។
មនុស្សរាប់ពាន់នាក់បានចូលរួមពិធីនេះនៅឯពហុកីឡដ្ឋានជាតិក្នុងរដ្ឋធានី Tegucigalpa ។ លោកស្រីបានថ្លែងពីតម្រូវការក្នុងការរៀបចំរចនាសម្ព័ន្ធឡើងវិញជុំវិញបំណុលជាតិ ដោយសារតែលោកស្រីត្រូវរ៉ាប់រងបំណុលដ៏ច្រើនមិនអាចប្រៀបផ្ទឹមបាននៅក្នុងប្រវត្តិសាស្ត្រនៃប្រទេស
ប៉ុន្តែលោកស្រីបានសន្យាថា រដ្ឋាភិបាលរបស់លោកស្រីនឹងមិនបន្តអំពើចោរកម្ម ដែលនឹងឱ្យយុវជនជំនាន់ក្រោយជាអ្នកសងបន្ដនោះឡើយ។ អនុប្រធានាធិបតីសហរដ្ឋអាមេរិក លោកស្រី Kamala Harris ក៏ស្ថិតក្នុងចំណោមមន្ត្រីបរទេសដែលបានចូលរួមក្នុងពិធីស្បថចូលកាន់តំណែងនេះផងដែរ ដោយទទួលបានសំឡេងទះដៃអបអរសាទរយ៉ាងច្រើនពីហ្វូងមនុស្សដែលបានប្រមូលផ្តុំ៕
