រដ្ឋាភិបាលហុងកុងនិយាយថា ការអត្ថាធិប្បាយលើយុទ្ធសាស្ត្រកូវីដមិនមែនជា”រឿងខុសច្បាប់”ទេ

រដ្ឋាភិបាលក្រុងហុងកុងបាននិយាយកាលពីថ្ងៃអាទិត្យថា កិច្ចពិភាក្សានិងការកត់សម្គាល់ទូទៅ “អំពីយុទ្ធសាស្រ្តគ្រប់គ្រងការចម្លងមេរោគកូវីដ-១៩របស់ទីក្រុងហុងកុងគឺមិនមែនជារឿងខុសច្បាប់ទេ ហើយក៏មិនបំពានលើច្បាប់សន្តិសុខជាតិរបស់ចិនដីគោកផងដែរ ខណៈដែលខ្លួនកំពុងដោះស្រាយការកើនឡើងនៃករណីឆ្លង។

ទីក្រុងហុងកុងបានដើរតាមគន្លងចិនដីគោកក្នុងការប្រកាន់ខ្ជាប់នូវគោលនយោបាយកូវីដសូន្យ ជាមួយនឹងកំណើនយ៉ាងឆាប់រហ័សនៃសេដ្ឋកិច្ចនិងសុខភាពផ្លូវចិត្ត។ វិធានការកាន់តែមានភាពតឹងរ៉ឹង បើធៀបនឹងការអនុវត្តដំបូងក្នុងឆ្នាំ២០២០កន្លងទៅ។

អ្នកជំនាញបាននិយាយថា គោលនយោបាយបច្ចុប្បន្នមិនមាននិរន្តរភាពទេ ដោយសារករណីបន្តកើនឡើង ក៏ដូចជាដោយសារតែមេរោគបំប្លែងថ្មីប្រភេទអូមីក្រុងមានលទ្ធភាពចម្លងខ្ពស់។រដ្ឋាភិបាលបានបញ្ជាក់ក្នុងសេចក្តីថ្លែងការណ៍មួយថា គោលនយោបាយរបស់ហុងកុងដើម្បីសម្រេចបាន “អត្រាឆ្លងកម្រិតសូន្យ” គឺជាមធ្យោបាយដ៏មានប្រសិទ្ធភាពបំផុតក្នុងការប្រយុទ្ធប្រឆាំងនឹងការផ្ទុះឡើង និងការពារសុខភាពសាធារណៈ។

សេចក្តីថ្លែងការណ៍នេះបានធ្វើឡើង បន្ទាប់ពីសមាជិកសភាក្នុងស្រុក លោក Junius Ho បាននិយាយថា អ្នកជំនាញដែលស្នើឱ្យទីក្រុងហុងកុងរស់នៅជាមួយមេរោគ ដូចដែលអ្នកជំនាញលោកខាងលិចធ្វើ ប្រហែលជាបានបំពានច្បាប់សន្តិសុខជាតិរបស់ខ្លួន។ នេះបើតាមការផ្សាយរបស់ទូរទស្សន៍ RTHK។

រដ្ឋាភិបាលបាននិយាយថា ជាង១លាននាក់ក្នុងចំណោមចំនួនប្រជាជនសរុប៧.៥លាននាក់នៅហុងកុងមិនបានចាក់វ៉ាក់សាំងទេ ដែលបង្ហាញឱ្យឃើញថា ពួកគេមានហានិភ័យខ្ពស់នៃការឆ្លងឬសូម្បីតែហានិភ័យនៃការស្លាប់។

ខណៈពេលដែលទីក្រុងហុងកុងទទួលបានជោគជ័យក្នុងការគ្រប់គ្រងការចម្លងមេរោគក្នុងឆ្នាំ២០២១ ប៉ុន្ដែក្នុងខែមករា ឆ្នាំ២០២២នេះ ករណីឆ្លងនៅទីក្រុងហុងកុងបានហក់ឡើងខ្ពស់គួរឱ្យកត់សម្គាល់។ ក្នុងខែមករា ចំនួនអ្នកឆ្លងក្នុងសហគមន៍មានជាង ៧០០ នាក់ បើធៀបទៅនឹងខែធ្នូ ឆ្នាំ២០២១ អ្នកឆ្លងក្នុងសហគមន៍មានតែ ២ នាក់ប៉ុណ្ណោះ។  ទីក្រុងនេះបានកត់ត្រាចំនួនអ្នកឆ្លងប្រហែល ១៣,៦០០ នាក់ និងអ្នកស្លាប់សរុប ២១៣ នាក់ ចាប់តាំងពីឆ្នាំ២០២០ ដែលជាអត្រាទាបជាងទីក្រុងធំៗដទៃទៀត៕