ផ្នែកមួយនៃផ្លូវល្បឿនលឿនមួយបានបាក់ស្រុតកាលពីថ្ងៃអង្គារចំពីលើការដ្ឋានសំណង់មួយក្នុងទីក្រុង Sao Paulo ប្រទេសប្រេស៊ីល ដែលជាកន្លែងដែលក្រុមហ៊ុន Acciona SA របស់ប្រទេសអេស្ប៉ាញកំពុងជីករូងក្រោមដីសម្រាប់ខ្សែរថភ្លើងក្រោមដីថ្មីមួយ។
គ្មានអ្នកស្លាប់និងរបួសត្រូវបានរាយការណ៍ឡើយ ប៉ុន្តែហេតុការណ៍នេះអាចប៉ះពាល់ដល់គម្រោងសាងសង់ ដែលធ្លាប់បានពន្យារពេលជាច្រើនដងមកហើយ និងបានក្លាយជានិមិត្តសញ្ញានៃការសាងសង់សំណង់សាធារណដែលមិនមានដំណើរការនៅក្នុងប្រទេសសេដ្ឋកិច្ចធំបំផុតរបស់តំបន់អាមេរិកឡាទីន។
រូបភាពបានបង្ហាញពីកំណាត់ផ្លូវនៃផ្លូវល្បឿនលឿន Marginal Tiete ធ្លាក់ចូលទៅក្នុងរណ្តៅមួយ ដែលស្ថិតនៅក្បែរការដ្ឋានសាងសង់ផ្លូវរូងក្រោមដីសម្រាប់រថភ្លើងខ្សែទី៦។ ប្រតិបត្តិកររថភ្លើងក្រោមដីរដ្ឋ Sao Paulo បានបញ្ជាក់នៅលើគេហទំព័ររបស់ខ្លួនថា ផ្លូវរូងក្រោមដីដែលជីកសម្រាប់គម្រោងរថភ្លើងក្រោមដីថ្មី ត្រូវបានជន់លិច។
មន្ត្រីសុវត្ថិភាពសាធារណៈបាននិយាយថា កម្មករទាំង ៥០ នាក់អាចចេញពីផ្លូវរូងក្រោមដីបាន ហើយមានតែ ២ នាក់ប៉ុណ្ណោះដែលត្រូវទទួលការព្យាបាល ដោយសារការប៉ះពាល់នឹងទឹកកខ្វក់ដែលហូរតាមកន្លែងនោះ។
មានព័ត៌មានមិនច្បាស់លាស់អំពីមូលហេតុដែលបណ្ដាលឱ្យមានទឹកជំនន់ និងបាក់ស្រុតជាបន្តបន្ទាប់។អភិបាលក្រុង Sao Paulo លោក Joao Doria បាននិយាយនៅក្នុងសន្និសីទសារព័ត៌មានថា បណ្ដាញទឹកស្អុយដែលជាកម្មសិទ្ធិរបស់ក្រុមហ៊ុន Sabesp ត្រូវបានប៉ះទង្គិច ដែលបណ្តាលឱ្យមានឧបទ្ទវហេតុនេះ។
ប៉ុន្តែលោក Andre De Angelo នាយកប្រចាំប្រទេសរបស់ Acciona នៅក្នុងប្រទេសប្រេស៊ីល បាននិយាយនៅក្នុងសន្និសីទសារព័ត៌មានដដែលថា មិនមានការប៉ះទង្គិចគ្នារវាងម៉ាស៊ីនជីក និងបណ្តាញលូនោះទេ។រដ្ឋអាជ្ញាបានបញ្ជាក់នៅក្នុងសេចក្តីថ្លែងការណ៍មួយថា ពួកគេបានបើកការស៊ើបអង្កេតលើឧបទ្ទវហេតុនេះ ដែលក្នុងនោះ ពួកគេនឹងស្វែងរកដើម្បីកំណត់ពីមូលហេតុច្បាស់លាស់នៃការបាក់ស្រុតនិងទំហំនៃការខូចខាត៕
