ប្រធានាធិបតីតួកគី លោក Tayyip Erdogan គ្រោងនឹងទៅជួបសមភាគីលោក Volodymyr Zelensky ក្នុងប្រទេសអ៊ុយក្រែននៅថ្ងៃព្រហស្បតិ៍នេះ បន្ទាប់ពីបានលើកប្រទេសតួកគីឱ្យក្លាយជាអ្នកសម្របសម្រួល ដើម្បីបន្ធូរបន្ថយភាពតានតឹងជាមួយរុស្ស៊ី ហើយមន្ត្រីម្នាក់បាននិយាយថា លោកមិនជ្រើសរើសភាគីណាមួយនៅក្នុងវិបត្តិនោះទេ។
មន្ត្រីតួកគីបានប្រាប់កាសែតរ៉យទ័រ ថាទីក្រុងអង់ការ៉ារំពឹងថាភាពតានតឹងនឹងធូរស្រាលបន្ទាប់ពីកិច្ចប្រជុំនៅទីក្រុងគៀវ។ កាលពីថ្ងៃពុធ ទីក្រុងអង់ការ៉ា និងទីក្រុងគៀវបាននិយាយថា ពួកគេនឹងចុះហត្ថលេខាលើកិច្ចព្រមព្រៀងពាណិជ្ជកម្មសេរី និងកិច្ចព្រមព្រៀងផ្សេងៗទៀត។
រុស្ស៊ីបានបដិសេធគម្រោងការឈ្លានពានអ៊ុយក្រែន ចំពេលមានការព្រួយបារម្ភពីប្រទេសលោកខាងលិចជាច្រើនជុំវិញការកសាងកងទ័ពជាង ១០ ម៉ឺននាក់នៅជិតព្រំដែន។ ប៉ុន្តែប្រទេសមហាអំណាចនេះបានទាមទារការធានាសន្តិសុខយ៉ាងទូលំទូលាយពីលោកខាងលិច។
ដំណើរទស្សនកិច្ចរបស់លោក Erdogan ធ្វើឡើងបន្ទាប់ពីដំណើរទស្សនកិច្ចរបស់មេដឹកនាំសមាជិកណាតូ ចក្រភពអង់គ្លេស ប៉ូឡូញ និងហូឡង់ ទៅកាន់ទីក្រុងគៀវចំពេលមានការប្រឈមមុខដាក់គ្នា។ តួកគីមានទំនាក់ទំនងល្អជាមួយទីក្រុងគៀវនិងទីក្រុងម៉ូស្គូ ប៉ុន្តែបាននិយាយថា ខ្លួននឹងធ្វើអ្វីដែលចាំបាច់ក្នុងនាមជាសមាជិកណាតូ ប្រសិនបើរុស្ស៊ីឈ្លានពាន។
ទីក្រុងអង់ការ៉ាកាលពីខែវិច្ឆិកាបានស្នើជួយបន្ធូរបន្ថយភាពតានតឹង ហើយកាលពីខែមុនប្រភពការទូតតួកគីបាននិយាយថាទាំងរុស្ស៊ី និងអ៊ុយក្រែនបើកចំហចំពោះគំនិតនេះ។
មន្ត្រីតួកគីមួយរូបផ្សេងទៀតដែលនិយាយក្នុងលក្ខខណ្ឌមិនបញ្ចេញឈ្មោះ បានបញ្ជាក់ថា លោក Erdogan នឹងអំពាវនាវឱ្យភាគីទាំងពីរអនុវត្តការអត់ធ្មត់ ហើយបានបន្ថែមថា ទីក្រុងអង់ការ៉ាចង់បន្តកិច្ចសហប្រតិបត្តិការជាមួយប្រទេសទាំងពីរយ៉ាងខ្លាំង។
មន្ត្រីរូបនេះបាននិយាយថា៖ “វិធីសាស្រ្តរបស់ប្រទេសតួកគីមិនមែនជ្រើសរើសភាគីម្ខាង ឬឈរប្រឆាំងនឹងប្រទេសមួយក្នុងភាពតានតឹងនោះទេ។ ជាមួយនឹងគំនិតផ្តួចផ្តើមរបស់លោក Erdogan និងជាមួយនឹងសារមួយចំនួនដែលលោកនឹងបង្ហាញ យើងរំពឹងថាភាពតានតឹងនឹងធូរស្រាល”៕
