របាយការណ៍របស់អង្គការសហប្រជាជាតិបានបញ្ជាក់ប្រាប់ប្រព័ន្ធផ្សព្វផ្សាយថា ការវាយប្រហារតាមអ៊ីនធឺណិតរបស់កូរ៉េខាងជើងបានលួចរូបិយប័ណ្ណឌីជីថល (Cryptocurrency) តម្លៃរាប់លានដុល្លារ ដើម្បីផ្តល់មូលនិធិដល់កម្មវិធីមីស៊ីលរបស់ប្រទេស។
អ្នកស៊ើបអង្កេតបានរកឃើញថាចន្លោះឆ្នាំ២០២០ និងពាក់កណ្តាលឆ្នាំ២០២១ អ្នកវាយប្រហារតាមអ៊ីនធឺណិតបានលួចទ្រព្យឌីជីថលច្រើនជាង $៥០លានដុល្លារ។ ពួកគេបាននិយាយថា ការវាយប្រហារបែបនេះគឺជា “ប្រភពចំណូលដ៏សំខាន់” សម្រាប់កម្មវិធីអាវុធនុយក្លេអ៊ែរ និងមីស៊ីលផ្លោងរបស់ទីក្រុងព្យុងយ៉ាង។
ការរកឃើញនេះត្រូវបានគេរាយការណ៍ថាបានប្រគល់ទៅឱ្យគណៈកម្មាធិការដាក់ទណ្ឌកម្មរបស់អង្គការសហប្រជាជាតិកាលពីថ្ងៃសុក្រ។ ការវាយប្រហារតាមអ៊ីនធឺណេតបានកំណត់គោលដៅយ៉ាងហោចណាស់ការផ្លាស់ប្តូររូបិយប័ណ្ណឌីជីថលចំនួនបីគឺនៅតំបន់អាមេរិកខាងជើង អឺរ៉ុប និងអាស៊ី។
របាយការណ៍នេះក៏បានយោងទៅលើការសិក្សាដែលបានចេញផ្សាយកាលពីខែមុនដោយក្រុមហ៊ុនសន្តិសុខ Chainalysis ដែលបានលើកឡើងថា ការវាយប្រហារតាមអ៊ីនធឺណិតរបស់កូរ៉េខាងជើងអាចទទួលបានទ្រព្យឌីជីថលដែលមានតម្លៃដល់ទៅ ៤០០ លានដុល្លារកាលពីឆ្នាំមុន។
ហើយនៅឆ្នាំ២០១៩ អង្គការសហប្រជាជាតិបានរាយការណ៍ថាប្រទេសកូរ៉េខាងជើងបានប្រមូលប្រាក់ប្រមាណ ២ ពាន់លានដុល្លារសម្រាប់កម្មវិធីអាវុធប្រល័យលោករបស់ខ្លួនដោយប្រើការវាយប្រហារតាមអ៊ីនធឺណិតដ៏ទំនើប។
គួរបញ្ជាក់ផងដែរថា កូរ៉េខាងជើងត្រូវបានក្រុមប្រឹក្សាសន្តិសុខអង្គការសហប្រជាជាតិហាមឃាត់មិនឲ្យធ្វើការបាញ់សាកល្បងអាវុធនុយក្លេអ៊ែរនិងបាញ់មីស៊ីលផ្លោងឡើយ។ របាយការណ៍របស់អង្គការសហប្រជាជាតិ បាននិយាយថា ទោះបីជាមានទណ្ឌកម្មយ៉ាងធ្ងន់ធ្ងរក៏ដោយ ក៏កូរ៉េខាងជើងនៅតែអាចបន្តអភិវឌ្ឍហេដ្ឋារចនាសម្ព័ន្ធនុយក្លេអ៊ែរ និងមីស៊ីលផ្លោងរបស់ខ្លួនបាន៕
