ប្រធានាធិបតីសហរដ្ឋអាមេរិក លោក ចូ បៃឌិន បាននិយាយកាលពីថ្ងៃចន្ទថា បំពង់បង្ហូរប្រេង Nord Stream 2 នឹងត្រូវបញ្ឈប់ ប្រសិនបើរុស្ស៊ីឈ្លានពានអ៊ុយក្រែន ហើយសង្កត់ធ្ងន់លើការរួបរួមជាមួយអធិការបតីអាល្លឺម៉ង់ លោក អូឡាហ្វ ស្ស៊ុល នៅពេលដែលលោកខាងលិចប្រមូលផ្តុំគ្នាដើម្បីបញ្ចៀសសង្រ្គាមនៅអឺរ៉ុប។
នៅក្នុងសន្និសីទសារព័ត៌មាននៅសេតវិមានជាមួយមេដឹកនាំអាល្លឺម៉ង់ថ្មី លោក បៃឌិន ដែលជាគូប្រជែងដ៏យូរអង្វែងនៃគម្រោងបំពង់បង្ហូរប្រេងដែលមានអាយុកាលមួយទសវត្សរ៍ទៅកាន់ប្រទេសអាល្លឺម៉ង់ពីប្រទេសរុស្ស៊ី បានមានប្រសាសន៍ថា កងកម្លាំងរុស្ស៊ីដែលឆ្លងកាត់ចូលទៅក្នុងអ៊ុយក្រែនអាចនាំឱ្យមានការបិទប្រព័ន្ធបង្ហូរប្រេង។លោក បៃឌិន បានថ្លែងថា៖ “ប្រសិនបើរុស្ស៊ីឈ្លានពាន នោះមានន័យថា រថក្រោះ ឬកងទ័ពឆ្លងកាត់ … ព្រំដែននៃប្រទេសអ៊ុយក្រែនម្តងទៀត នោះនឹងមិនមាន … ប្រព័ន្ធបង្ហូរប្រេង Nord Stream 2 ទៀតឡើយ។ យើងនឹងបញ្ចប់វា”។
នៅពេលអ្នកកាសែតសួរថាតើគម្រោងនេះស្ថិតក្នុងការគ្រប់គ្រងរបស់អាល្លឺម៉ង់ដោយរបៀបណា លោក បៃឌិន បានឆ្លើយតបថា៖ “ខ្ញុំសន្យានឹងអ្នក យើងនឹងអាចធ្វើវាបាន”។
លោក ស្ស៊ុល បាននិយាយថា សហរដ្ឋអាមេរិក និងអាល្លឺម៉ង់មានវិធីសាស្រ្តដូចគ្នាចំពោះអ៊ុយក្រែន ចំពោះរុស្ស៊ី និងការដាក់ទណ្ឌកម្ម ប៉ុន្តែមិនបានបញ្ជាក់ដោយផ្ទាល់អំពីផែនការ Nord Stream 2 ឬនិយាយអំពីបំពង់បង្ហូរប្រេងនេះជាសាធារណៈក្នុងអំឡុងពេលនៃដំណើរទស្សនកិច្ចរយៈពេលមួយថ្ងៃរបស់លោកទៅកាន់សហរដ្ឋអាមេរិកនោះទេ។ចម្ងល់ជុំវិញថាតើសហរដ្ឋអាមេរិកនិងអាល្លឺម៉ង់ពួតដៃគ្នាដើម្បីបញ្ចប់គម្រោងតម្លៃជាង ១១ ពាន់លានដុល្លារនេះបានក្លាយជាសំណួរដ៏សំខាន់មួយ នៅពេលដែលប្រទេសប្រជាធិបតេយ្យធំៗទាំងពីរកំពុងដឹកនាំប្រទេសសម្ព័ន្ធមិត្តណាតូឱ្យប្រឆាំងរុស្ស៊ី។
គួរបញ្ជាក់ផងដែរថា រុស្ស៊ីបានប្រមូលទ័ពជិត ១០ ម៉ឺននាក់នៅជិតព្រំដែនអ៊ុយក្រែន ប៉ុន្ដែបានបដិសេធថា ខ្លួនមិនបានរៀបចំផែនការលុកលុយទេ។ ចំណែកឯមន្ត្រីសហរដ្ឋអាមេរិកបាននិយាយថា ការវាយប្រហារអាចកើតឡើងក្នុងរយៈពេលប៉ុន្មានថ្ងៃ ឬច្រើនសប្តាហ៍ខាងមុខ។លោកអធិការបតីអាល្លឺម៉ង់កំពុងស្ថិតក្រោមការរិះគន់ទាំងក្នុងនិងក្រៅប្រទេសជុំវិញការដឹកនាំមិនបានគ្រប់ជ្រុងជ្រោយរបស់លោកលើវិបត្តិអ៊ុយក្រែន។ ក្នុងសន្និសីទកាសែត លោកបានថ្លែងប្រាប់អ្នកយកព័ត៌មានថា រុស្ស៊ីនឹងខាតបង់ធ្ងន់ធ្ងរ ប្រសិនបើខ្លួនឈ្លានពានអ៊ុយក្រែន ហើយបានបញ្ជាក់ថា អាល្លឺម៉ង់និងសហរដ្ឋអាមេរិកមានវិធីសាស្ត្រដូចគ្នា៕
