ក្រុមហ៊ុន Pfizer Inc បាននិយាយកាលពីថ្ងៃអង្គារថា ខ្លួនរំពឹងថាការលក់វ៉ាក់សាំងបង្ការជំងឺកូវីដ-១៩ក្នុងឆ្នាំ២០២២ និងថ្នាំលេបព្យាបាលជំងឺរបស់ខ្លួនអាចឈានដល់ ៥៤ ពាន់លានដុល្លារ ប៉ុន្តែវាបានធ្លាក់ចុះតិចជាងការប៉ាន់ស្មានរបស់ក្រុមហ៊ុនវិភាគវិស័យទីផ្សារភាគហ៊ុន Wall Street ហើយភាគហ៊ុនរបស់ក្រុមហ៊ុននេះធ្លាក់ចុះប្រហែល ៣ ភាគរយ។
ទោះយ៉ាងណា នាយកប្រតិបត្តិក្រុមហ៊ុន លោក Albert Bourla បាននិយាយថា ការលក់ចុងក្រោយសម្រាប់ថ្នាំលេបប្រឆាំងវីរុសកូវីដ-១៩ឈ្មោះ Paxlovid អាចលក់បានច្រើនជាងការព្យាករណ៍របស់ក្រុមហ៊ុន ដែលបច្ចុប្បន្នមាននៅក្នុងកិច្ចសន្យា ដែលគ្រោងនឹងជិតចុះហត្ថលេខា។
បច្ចុប្បន្ន ក្រុមហ៊ុន Pfizer រំពឹងថា ការលក់ឱសថអាចមានទំហំ ២២ ពាន់លានដុល្លារក្នុងឆ្នាំ២០២២ ខណៈ Wall Street បានប៉ាន់ស្មានថា ក្រុមហ៊ុននេះអាចលក់បាន ២២.៨៨ ពាន់លានដុល្លារ។លោក Bourla បានប្រាប់ក្រុមអ្នកវិភាគថា៖ “ច្បាស់ណាស់ នេះគ្រាន់តែជាផ្នែកមួយនៃការព្យាបាល ១២០ លានដង ដែលយើងកំពុងរៀបចំផលិតនៅក្នុងឆ្នាំនេះ”។
ក្រុមហ៊ុនកំពុងលក់ថ្នាំលេបឈ្មោះ Paxlovid ទៅឱ្យសហរដ្ឋអាមេរិកក្នុងតម្លៃប្រហែល ៥៣០ ដុល្លារក្នុងមួយកំប៉ុង ប៉ុន្តែលោក Bourla បាននិយាយថា នោះជាតម្លៃពិសេសដោយសារតែទំហំនៃការបញ្ជាទិញ។
លោកបាននិយាយថា តម្លៃសម្រាប់ប្រទេសដែលមានប្រាក់ចំណូលខ្ពស់ភាគច្រើននឹងច្រើន ឬតិចជាងនេះ ស្របតាមតម្លៃនៃការព្យាបាលគូប្រជែងរបស់ក្រុមហ៊ុន Merck & Co molnupiravir ដែលរដ្ឋាភិបាលសហរដ្ឋអាមេរិកបានទិញក្នុងតម្លៃប្រហែល ៧០០ ដុល្លារក្នុងមួយកំប៉ុង៕
