អន្តរជាតិ៖រដ្ឋមន្ត្រីការបរទេស និងពាណិជ្ជកម្មហុងគ្រី លោក Peter Szijjarto បាននិយាយកាលពីថ្ងៃពុធថា វ៉ាក់សាំងប្រឆាំងមេរោគ COVID-19ផលិតដោយ រុស្ស៊ីនិងចិនមានប្រសិទ្ធភាពនិងសុវត្ថិភាព។លោក Szijjarto បាននិយាយនៅក្នុងវីដេអូមួយដែលបានផ្សព្វផ្សាយនៅលើទំព័រ Facebook របស់គាត់ថា៖«វាច្បាស់ណាស់ថាវ៉ាក់សាំងរបស់លោកខាងកើតដែលប្រើក្នុងប្រទេសហុងគ្រីកំពុងដំណើរការល្អ។ វ៉ាក់សាំងទាំងនោះមានសុវត្ថិភាព និងមានប្រសិទ្ធភាពខ្ពស់ក្នុងការប្រឆាំងមេរោគកូវីដ»។
លោករដ្ឋមន្ត្រីបាននិយាយនៅក្នុងវីដេអូ ដែលត្រូវបានថតនៅអាកាសយានដ្ឋាន Budapest មុនពេលចាកចេញទៅកាន់ទីក្រុង Lyon ប្រទេសបារាំងថា៖«វាដល់ពេលសម្រាប់អង្គការអន្តរជាតិដើម្បីធ្វើការសម្រេចចិត្តប្រកបដោយវិជ្ជាជីវៈ និងមិនមែនជាការសម្រេចចិត្តផ្នែកនយោបាយលើបញ្ហានេះទេ»។
លោកSzijjarto បានបញ្ជាក់ថាគាត់កំពុងសំដៅទៅលើវ៉ាក់សាំង Sputnik V របស់រុស្ស៊ី និងវ៉ាក់សាំង Sinopharmរបស់ចិន។ វ៉ាក់សាំងទាំងពីរនេះត្រូវបានគេប្រើយ៉ាងទូលំទូលាយនៅក្នុងប្រទេសហុងគ្រី ប៉ុន្តែមិនត្រូវបានទទួលស្គាល់ដោយរដ្ឋសមាជិកសហភាពអឺរ៉ុប(EU)មួយចំនួនទៀតនៅឡើយ។
អ្នកការទូតកំពូលហុងគ្រីរូបនេះបានធ្វើតំណើរទៅកាន់ទីក្រុងលីយ៉ុង ដើម្បីចូលរួមកិច្ចប្រជុំរដ្ឋមន្ត្រីការបរទេស និងសុខាភិបាលសហភាពអឺរ៉ុប។ ពួកគេកំពុងប្រមូលផ្តុំគ្នាដើម្បីពិភាក្សាអំពីការប្រយុទ្ធប្រឆាំងនឹងជំងឺរាតត្បាតសកលកូវីដ-១៩ ដោយផ្តោតជាពិសេសលើការជួយប្រទេសកំពុងអភិវឌ្ឍន៍។លោកSzijjarto បានបន្ថែមថា៖«ឥឡូវនេះ វាដល់ពេលដែលពិភពលោកត្រូវដឹងថា ការជ្រើសរើសវ៉ាក់សាំងមិនមែនជាការប្តេជ្ញាចិត្តខាងនយោបាយទេ នៅពេលដែលពិភពលោកទាំងមូលកំពុងព្យាយាមចាក់វ៉ាក់សាំងឱ្យបានច្រើនតាមតែអាចធ្វើទៅបាន ហើយការយល់ព្រមលើវ៉ាក់សាំងមិនគួរជាសំណួរខាងនយោបាយនោះទេ»។
លោករដ្ឋមន្ត្រីបាននិយាយថា វ៉ារ្យ៉ង់ថ្មីនៃមេរោគឆ្លងអាចលេចចេញបានដរាបណាអត្រា អ្នកចាក់វ៉ាក់សាំងទាបនៅក្នុងប្រទេសមួយចំនួន។ការសាងសង់រោងចក្រវ៉ាក់សាំងជាតិរបស់ប្រទេសហុងគ្រីកំពុងដំណើរការ ហើយនឹងអាចឱ្យប្រទេសនេះចូលរួមក្នុងការផលិតវ៉ាក់សាំងជាសកលចាប់ពីចុងឆ្នាំ២០២២នេះ។ហុងគ្រីគឺជាសមាជិកសហភាពអឺរ៉ុបដំបូងគេដែលទទួលស្គាល់ និងប្រើប្រាស់វ៉ាក់សាំងរបស់ចិន។ ប្រធានាធិបតីហុងគ្រី លោក Janos Ader និងនាយករដ្ឋមន្ត្រី Viktor Orban បានចាក់វ៉ាក់សាំងចិន។
លោក Szijjarto ក៏កំពុងធ្វើទស្សនកិច្ចនៅប្រទេសបារាំងដើម្បីសម្ពោធស្ថានកុងស៊ុលហុងគ្រីនៅទីក្រុងលីយ៉ុងផងដែរ។ ទីក្រុងនេះមានប្រជាជនហុងគ្រីរស់នៅប្រមាណ 20,000នាក់៕
