ចិនសន្យាផ្ដល់ការគាំទ្រដល់ហុងកុង ខណៈការឆ្លងបានកើនឡើងដល់កំណត់ត្រាថ្មី

ការិយាល័យទទួលបន្ទុកត្រួតពិនិត្យបញ្ហាស្ថានភាពជំងឺកូវីដ-១៩នៅក្នុងទីក្រុងហុងកុងបាននិយាយថា ប្រទេសចិននឹងគាំទ្រយ៉ាងពេញទំហឹងចំពោះទីក្រុងហុងកុងជាមួយនឹងយុទ្ធសាស្ត្រ “កូវីដសូន្យ” ខណៈពេលដែលទីក្រុងនេះបានឈានដល់អត្រាឆ្លងប្រចាំដ៏ខ្ពស់បំផុតនៅថ្ងៃសុក្រនេះ។

ទីក្រុងហុងកុងនឹងរាយការណ៍ពីករណីឆ្លងថ្មីប្រចាំថ្ងៃយ៉ាងហោចណាស់ ១,៣២៥ នាក់នៅថ្ងៃសុក្រ។ នេះបើយោងតាមការផ្សព្វផ្សាយរបស់ទូរទស្សន៍ TVB ដែលបានរាយការណ៍ថាជាកំណត់ត្រាថ្មី បន្ទាប់ពីការឆ្លងបានកើនឡើងទ្វេដងរហូតដល់ទៅ ១,១៦១ នាក់កាលពីថ្ងៃពុធ។

អ្នកនាំពាក្យការិយាល័យកិច្ចការហុងកុង និងម៉ាកាវ (HKMAO) ដែលស្ថិតនៅក្រោមក្រុមប្រឹក្សារដ្ឋ ឬគណៈរដ្ឋមន្ត្រីរបស់ប្រទេសចិន បាននិយាយនៅក្នុងសេចក្តីថ្លែងការណ៍មួយថា រដ្ឋាភិបាលកណ្តាលមានការព្រួយបារម្ភយ៉ាងខ្លាំងអំពីសុវត្ថិភាព និងសុខភាពរបស់អ្នកស្រុក ក៏ដូចជាសេដ្ឋកិច្ច និងជីវភាពរស់នៅរបស់ប្រជាជន។

សេចក្តីថ្លែងការណ៍បានបញ្ជាក់បន្ដថា ខ្លួននឹងរៀបចំកិច្ចប្រជុំរបស់មន្ត្រីចិនដីគោកនិងហុងកុងនៅទីក្រុង Shenzhen ដែលនៅជិតខាងនាពេលខាងមុខ ដើម្បីរក្សាស្ថិរភាព និងបង្កើតគោលនយោបាយគាំទ្រដល់ការប្រយុទ្ធប្រឆាំងនឹងជំងឺរបស់ហុងកុង។

សេចក្ដីថ្លែងការណ៍បានបន្ថែមថា៖ “ដរាបណាហុងកុងស្វែងរកជំនួយ ចិនដីគោកប្រាកដជាឆ្លើយតប … ចាប់ដៃគ្នា  យើងប្រាកដជាអាចយកឈ្នះលើការរាតត្បាតបានក្នុងពេលឆាប់ៗនេះ”។កាសែត South China Morning Post បានរាយការណ៍ដោយដកស្រង់ប្រភពដែលមានមូលដ្ឋាននៅទីក្រុងប៉េកាំងថា  រដ្ឋាភិបាលចិននឹងជួយកែលម្អសមត្ថភាពធ្វើតេស្តរបស់ទីក្រុងហុងកុង និងបង្កើតកន្លែងដាក់ឱ្យនៅដាច់ពីគេមួយផ្សេងទៀត។

ចិនដីគោកក៏កំពុងរៀបចំបញ្ជូនបុគ្គលិកពេទ្យ និងមន្ទីរពិសោធន៍រាប់ពាន់នាក់ និងឧបករណ៍ធ្វើតេស្តរាប់លានទៅកាន់ទីក្រុងហុងកុង ជាមួយនឹងការបង្កើនសមត្ថភាពពិនិត្យមេរោគប្រចាំថ្ងៃពី ១០ ម៉ឺនទៅដល់ ៣០ ម៉ឺននាក់៕