ការកាត់ក្តីថ្មីមួយប្រឆាំងនឹងមេដឹកនាំគណបក្សប្រឆាំងរុស្ស៊ីដែលកំពុងជាប់ពន្ធនាគារ លោក Alexei Navalny បានចាប់ផ្តើមនៅក្នុងពន្ធនាគារដែលមានការយាមកាមយ៉ាងតឹងរ៉ឹងបំផុតនៅភាគខាងកើតនៃរដ្ឋធានីម៉ូស្គូ ជាកន្លែងលោកកំពុងជាប់ឃុំ។
លោក Navalny ត្រូវបានចោទប្រកាន់ពីបទក្លែងបន្លំ។ លោកបានជាប់ឃុំអស់ពេលមួយឆ្នាំរួចមកហើយ បន្ទាប់ពីបានរួចជីវិតពីការវាយប្រហារដោយថ្នាំពុល ដែលលោកបានស្ដីបន្ទោសថា ជាស្នាដៃរបស់វិមានក្រឹមឡាំង។ បច្ចុប្បន្ន លោកកំពុងអនុវត្តទោសពីរឆ្នាំកន្លះ។
ការកាត់ក្តីចុងក្រោយនេះ អាចមើលឃើញថា ពេលវេលាជាប់ពន្ធនាគាររបស់លោកត្រូវបានបន្តរហូតដល់ជាងមួយទសវត្សរ៍។
រដ្ឋមន្ត្រីការបរទេសសហរដ្ឋអាមេរិក លោក Antony Blinken បានហៅការចោទប្រកាន់ថ្មីថា “គួរឱ្យសង្ស័យ” ហើយបាននិយាយថា លោក Navalny និងសហការីរបស់លោកគឺជាគោលដៅ ដោយសារតែការងាររបស់ពួកគេ ដែលចង់បកស្រាយបញ្ហាអំពើពុករលួយ។ លោករដ្ឋមន្ត្រីបានអំពាវនាវឲ្យអាជ្ញាធររុស្ស៊ីដោះលែងអ្នកទោស។
គួរបញ្ជាក់ផងដែរថា លោក Navalny មេដឹកនាំគណបក្សប្រឆាំងរុស្ស៊ីដ៏លេចធ្លោ អាយុ ៤៥ ឆ្នាំត្រូវបានឃុំខ្លួននៅពេលដែលលោកត្រលប់ទៅប្រទេសរុស្ស៊ីវិញក្នុងខែមករា ឆ្នាំ២០២១ បន្ទាប់ពីការព្យាបាលជាច្រើនខែនៅប្រទេសអាល្លឺម៉ង់ ក្រោយពេលដែលលោកត្រូវបានបំពុលដោយសារធាតុគីមី Novichok។
នៅខែបន្ទាប់ លោកត្រូវបានកាត់ទោសឱ្យជាប់ពន្ធនាគាររយៈពេល ៣ ឆ្នាំកន្លះពីបទបំពានលក្ខខណ្ឌនៃការព្យួរទោសនៅក្នុងសំណុំរឿងកេងបន្លំ។ លោក Navalny ទទូចថាការចោទប្រកាន់នេះគឺមានហេតុផលនយោបាយ៕
