រថយន្តហ៊ីណូដឹកទំនិញមួយគ្រឿងសង្ស័យតៃកុងងងុយដេករ៉េបុករះ រនាំងចែកទ្រូងផ្លូវ

ខេត្តបាត់ដំបង!

សង្ស័យតៃកុងងងុយដេក រថយន្តហ៊ីណូ (HINO)ដឹកទំនិញធុនធ្ងន់មួយគ្រឿងបានរ៉េចង្កូតឡើងបុករនាំងដែកចែកទ្រូងផ្លូវបណ្តាលអោយខូចខាតជាច្រើនម៉ែត្រ ប៉ុន្តែមិនបង្កអោយមានគ្រោះថ្នាក់ដល់អាយុជីវិតមនុស្សឡើយ។សមត្ថកិច្ចបានអោយដឹងថា! ករណីគ្រោះថ្នាក់ចរាចរណ៍ខាងលើនេះបានកើតឡើងនៅវេលាម៉ោង ២៣និង៣០ នាទីយប់ ថ្ងៃទី ១៤ ខែកុម្ភៈ ឆ្នាំ២០២២ នៅតាមបណ្តោយផ្លូវជាតិលេខ៥ ស្ថិតត្រង់ចំណុចភូមិត្រស់ ឃុំអូរតាគី ស្រុកថ្មគោល ខេត្តបាត់ដំបង ។

ប្រភពនៅកន្លែងកើតហេតុបានប្រាប់ថា នៅមុនពេលកើតហេតុគេឃើញរថយន្តម៉ាកហ៊ីណូ(HINO) ដឹកទំនិញធុនធ្ងន់ពណ៌ខៀវលាយសមួយគ្រឿង ពាក់ស្លាកលេខ ខាងមុខភ្នំពេញ 3E-5352 និងកន្ទុយក្រោយ ភ្នំពេញ 4A-5491 (ដឹកអង្ករ)បើកបរតាមបណ្តោយផ្លូវជាតិលេខ០៥ ក្នុងទិសដៅពីជើងទៅត្បូង លុះមកដល់ចំណុចកើតហេតុខាងលើសង្ស័យតៃកុងងងុយដេកបានរ៉េចង្កូតមកខាងឆ្វេងដៃបណ្តាលអោយឡើងបុករនាំងដែកចែកខាន់ទ្រូងផ្លូវខូចខាតអស់ជាច្រើនម៉ែត្រ ចំណែករថយន្តខូចខាតផ្នែកខាងមុខយ៉ាងដំណំ តែមិនបណ្តាលអោយមានគ្រោះថ្នាក់ដល់មនុស្សឡើយ។

ក្រោយពេលកើតហេតុសមត្ថកិច្ចជំនាញបានចុះទៅធ្វើការវាស់វែងនិងកាត់ស្ទូចយករថយន្តខាងលើទៅរក្សាទុកនៅការិយាល័យចរាចរណ៍ផ្លូវគោកខេត្តដើម្បីរង់ចាំអោយខាងក្រុមហ៊ុនចូលខ្លួនមកដោះស្រាយតាមផ្លូវច្បាប់។