ចក្រភពអង់គ្លេសបានសន្យាផ្តល់ប្រាក់ ២៥ លានផោន (៣៤ លានដុល្លារ) ដើម្បីពង្រឹងសន្តិសុខនៅតំបន់ឥណ្ឌូ-ប៉ាស៊ីហ្វិកដែលជាផ្នែកមួយនៃកិច្ចព្រមព្រៀងជាមួយអូស្ត្រាលី ហើយមេដឹកនាំនៃប្រទេសទាំងពីរបានសម្តែង “ការព្រួយបារម្ភយ៉ាងខ្លាំង” អំពីគោលនយោបាយរបស់ប្រទេសចិននៅក្នុងខេត្តស៊ីនជាំង។
នៅក្នុងជំនួបតាមប្រព័ន្ធអនឡាញកាលពីថ្ងៃព្រហស្បតិ៍ នាយករដ្ឋមន្ត្រីចក្រភពអង់គ្លេស លោក Boris Johnson និងសមភាគីអូស្ត្រាលី លោក Scott Morrison ក៏បានអំពាវនាវឱ្យមានសន្តិភាពនិងស្ថិរភាពនៅទូទាំងច្រកសមុទ្រតៃវ៉ាន់ ហើយបានព្រមានរុស្ស៊ីពីការឈ្លានពានអ៊ុយក្រែន។
មេដឹកនាំបានបញ្ជាក់នៅក្នុងសេចក្តីថ្លែងការណ៍រួមមួយបន្ទាប់ពីកិច្ចប្រជុំទ្វេភាគីថា៖ “ពួកគេបានយល់ព្រមលើតម្រូវការសម្រាប់ការបន្ថយភាពតានតឹង ហើយបានគូសបញ្ជាក់ថា ការលុកលុយរបស់រុស្ស៊ីក្នុងទឹកដីអ៊ុយក្រែននឹងក្លាយជាកំហុសយុទ្ធសាស្ត្រដ៏ធំ ដែលនឹងខាតបង់តម្លៃមនុស្សជាតិយ៉ាងធ្ងន់ធ្ងរ”។
លោក Morrison និងលោក Johnson បានលើកឡើងថា មូលនិធិសម្រាប់កិច្ចព្រមព្រៀងសន្តិសុខក្នុងតំបន់ឥណ្ឌូ-ប៉ាស៊ីហ្វិកនឹងពង្រឹងភាពធន់ក្នុងតំបន់និងបណ្ដាវិស័យមួយចំនួន រួមទាំងបណ្តាញអ៊ីនធឺណែត ការគំរាមកំហែងរបស់រដ្ឋ និងសន្តិសុខដែនសមុទ្រជាដើម។
កិច្ចពិភាក្សាទ្វេភាគីកើតឡើងតែមួយសប្តាហ៍ បន្ទាប់ពីកិច្ចប្រជុំក្នុងក្របខណ្ឌសម្ព័ន្ធចតុភាគី (Quad) ដែលប្រទេសអូស្ត្រាលី សហរដ្ឋអាមេរិក ជប៉ុន និងឥណ្ឌាបានសន្យាថានឹងពង្រឹងកិច្ចសហប្រតិបត្តិការឱ្យកាន់តែស៊ីជម្រៅ ដើម្បីធានាថាតំបន់ឥណ្ឌូ-ប៉ាស៊ីហ្វិកមិនមាន “ការបង្ខិតបង្ខំ”។
មេដឹកនាំចក្រភពអង់គ្លេសនិងអូស្ដ្រាលីបានសម្តែង ការព្រួយបារម្ភយ៉ាងខ្លាំងអំពីរបាយការណ៍ ដែលអាចជឿទុកចិត្តបានថា មានការរំលោភសិទ្ធិមនុស្សនៅក្នុងខេត្តស៊ីនជាំង ហើយបានអំពាវនាវឱ្យប្រទេសចិនការពារសិទ្ធិ សេរីភាព និងស្វ័យភាពកម្រិតខ្ពស់សម្រាប់ហុងកុង។
ដោយឡែក សហរដ្ឋអាមេរិកក៏បានចោទចិនពីបទប្រល័យពូជសាសន៍ក្នុងការប្រព្រឹត្តលើជនជាតិភាគតិចអ៊ុយហ្គ័រនៅខេត្តស៊ីនជាំង និងការរំលោភបំពានរួមទាំងការបង្ខំ និងពលកម្មក្នុងពន្ធនាគារផងដែរ។ ចិនបានបដិសេធការចោទប្រកាន់នេះ៕
