ករណីឆ្លងមេរោគកូវីដ-១៩ប្រចាំថ្ងៃរបស់កូរ៉េខាងត្បូងកើនលើសពី១០ម៉ឺននាក់ ខណៈបម្រាមគោចរត្រូវបានបន្ធូរបន្ថយមុនការបោះឆ្នោត

ករណីថ្មីនៃមេរោគកូវីដ-១៩ប្រចាំថ្ងៃរបស់កូរ៉េខាងត្បូងបានឡើងដល់ចំណុចកំពូលរហូតដល់ទៅ ១០០,០០០ នាក់ជាលើកដំបូង ចំពេលមានការផ្ទុះឡើងនៃមេរោគបំប្លែងខ្លួនថ្មីប្រភេទអូមីក្រុង ដោយអាជ្ញាធរបាននិយាយថា វិធានការរក្សាគម្លាតសង្គមនឹងត្រូវបន្ធូរបន្ថយបន្តិចមុនការបោះឆ្នោតជ្រើសរើសប្រធានាធិបតីនៅថ្ងៃទី៩ ខែមីនាខាងមុខ។

អាជ្ញាធរបានប្រកាសកាលពីថ្ងៃសុក្រថា ពួកគេនឹងផ្លាស់ប្តូរបម្រាមគោចរលើភោជនីយដ្ឋាន និងហាងកាហ្វេដោយលើកម៉ោងពីម៉ោង ៩ យប់ទៅម៉ោង ១០ យប់វិញ ខណៈមានការរិះគន់កាន់តែខ្លាំងពីម្ចាស់អាជីវកម្ម។
លោកប្រធានាធិបតី Moon Jae-in បានថ្លែងក្នុងកិច្ចប្រជុំមួយកាលពីថ្ងៃសុក្រថា ស្ថានភាពសម្រាប់ម្ចាស់អាជីវកម្មខ្នាតតូច និងអ្នកធ្វើការឯករាជ្យគឺហាក់ដូចជាមិនអំណោយផល នៅពេលលោកអំពាវនាវឱ្យសភាអនុម័តកញ្ចប់ថវិកាបន្ថែមយ៉ាងឆាប់រហ័សជាមួយនឹងវិធានការសម្រាប់ការដោះស្រាយបញ្ហាជីវភាពរបស់ប្រជាជន។

វិធានការប្រឆាំងការរាតត្បាតផ្សេងទៀត ដូចជាការកំណត់ចំនួនអ្នកជួបជុំលក្ខណៈឯកជនត្រឹម៦នាក់ ការដាក់ឱ្យនៅដាច់ពីគេរយៈពេលប្រាំពីរថ្ងៃសម្រាប់អ្នកដំណើរមកពីក្រៅប្រទេស ការបន្ដពាក់ម៉ាសនៅទីសាធារណៈ និងការប្រើប្រាស់បណ្ណចាក់វ៉ាក់សាំងនៅតាមទីតាំងអាជីវកម្មនឹងបន្ដរហូតដល់ថ្ងៃទី១៣ ខែមីនា រហូតដល់ក្រោយពេលបោះឆ្នោត។
លោក Moon ត្រូវបានរារាំងដោយរដ្ឋធម្មនុញ្ញមិនឱ្យឈរឈ្មោះសាជាថ្មី។ គូប្រជែងឈានមុខគេទាំងពីរត្រូវបានជាប់គាំងក្នុងការប្រកួតប្រជែងដ៏តឹងតែងបំផុតមិនធ្លាប់មានក្នុងរយៈពេល ២០ឆ្នាំ។

ខណៈពេលដែលករណីឆ្លងកំពុងកើនឡើង កូរ៉េខាងត្បូងបានកាត់បន្ថយការតាមដាន ការស្វែងរកអ្នកប៉ះពាល់ និងយុទ្ធសាស្រ្តដាក់ឱ្យនៅដាច់ពីគេ។ ឥឡូវនេះ អ្នកដែលមានរោគសញ្ញាតិចតួច ឬគ្មានកំពុងព្យាបាលនៅផ្ទះជាជាងព្យាបាលនៅមន្ទីរពេទ្យ ឬមណ្ឌលនានា ហើយមានតែមនុស្សនៅក្នុងក្រុមអាទិភាពប៉ុណ្ណោះដែលអាចធ្វើតេស្តតាមម៉ាស៊ីន PCR ភា្លមៗដោយឥតគិតថ្លៃ៕