ចក្រភព​អង់គ្លេស និង​បារាំង​ថ្កោលទោស​ចំណាត់ការ​របស់​រុស្ស៊ី​ក្នុងការ​ទទួលស្គាល់​តំបន់ចំនួន​ពីរនៃប្រទេសអ៊ុយក្រែន

អន្តរជាតិ៖ប្រទេសអង់គ្លេសនិងបារាំងបានប្រតិកម្មយ៉ាងខ្លាំងចំពោះការសម្រេចចិត្តរបស់រុស្ស៊ីក្នុងការទទួលស្គាល់ នូវតំបន់បំបែកខ្លួនចំនួនពីរនៅភាគខាងកើតអ៊ុយក្រែនជារដ្ឋឯករាជ្យ។នាយករដ្ឋមន្ត្រីអង់គ្លេស លោក Boris Johnson បានរិះគន់ប្រធានាធិបតីរុស្ស៊ី លោក Vladimir Putin នៅក្នុងសន្និសីទសារព័ត៌មានមួយកាលពីថ្ងៃចន្ទ។លោកJohnson បានមានប្រសាសន៍ថាទង្វើនេះគឺបំពានច្បាប់អន្តរជាតិនិងជាការរំលោភលើអធិបតេយ្យភាពនិងបូរណភាពរបស់អ៊ុយក្រែនយ៉ាងច្បាស់លាស់។

ក្រោយ​មក នាយក​រដ្ឋមន្ត្រី​អង់គ្លេស​បានសន្ទនាជាមួយ​ប្រធានាធិបតី​អ៊ុយក្រែន Volodymyr Zelenskyy តាម​ទូរស័ព្ទ។ លោក Johnsonបានប្រាប់លោក Zelenskyy ថាគាត់ជឿជាក់ថារុស្ស៊ីអាចឈ្លានពានលេបយកប្រទេសអ៊ុយក្រែងក្នុងរយៈពេលប៉ុន្មានម៉ោង និងប៉ុន្មានថ្ងៃខាងមុខនេះយ៉ាងពិតប្រាកដ។អ្នកនាំពាក្យរដ្ឋាភិបាលអង់គ្លេសបានបន្ថែមថាលោក Johnson នឹងយល់ព្រមលើកញ្ចប់ទណ្ឌកម្មប្រឆាំងរុស្ស៊ីនៅថ្ងៃអង្គារនេះនិងបង្កើនជំនួយការពារជាតិសម្រាប់អ៊ុយក្រែន។

ទន្ទឹមគ្នានេះការិយាល័យរបស់ប្រធានាធិបតីបារាំង Emmanuel Macron ក៏បានចេញសេចក្តីថ្លែងការណ៍មួយនៅថ្ងៃចន្ទសប្ដាហ៍នេះដែរ។ សេចក្ដីថ្លែងការណ៍នោះបាននិយាយថា ចំណាត់ការរបស់រុស្ស៊ីគឺជាការរំលោភដោយឯកតោភាគីចំពោះការប្តេជ្ញាចិត្តជាអន្តរជាតិរបស់រុស្ស៊ី និងជាការវាយប្រហារលើអធិបតេយ្យភាពរបស់អ៊ុយក្រែន។លោក Macron កំពុងអំពាវនាវឱ្យមានកិច្ចប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិ។ លោក​ក៏​កំពុង​អំពាវនាវ​ឲ្យ​មាន​ការ​ដាក់​ទណ្ឌកម្ម​ពី​សមាជិក​សហភាព​អឺរ៉ុបផងដែរ។

មន្ត្រីជាន់ខ្ពស់មួយរូបនៅការិយាល័យប្រធានាធិបតីបារាំងបានប្រាប់អ្នកសារព័ត៌មានថា ការបន្តកិច្ចចរចាជាមួយរុស្ស៊ីគឺជាភាពចាំបាច់បំផុត ដើម្បីកុំឱ្យស្ថានការណ៍វិវត្តន៍កាន់តែអាក្រក់ទៅៗ។មន្ត្រីរូបនេះបាននិយាយថា ដូច្នេះជំនួបរវាងរដ្ឋមន្ត្រីការបរទេសបារាំងលោក Jean-Yves Le Drian និងសមភាគីរុស្ស៊ី លោក Sergey Lavrov នឹងត្រូវធ្វើឡើងនៅថ្ងៃសុក្រនាទីក្រុងប៉ារីសតាមការគ្រោងទុក។

តែយ៉ាងណាក៏ដោយមន្ត្រីរូបនេះបានបន្ថែមថា កិច្ចប្រជុំកំពូលដែលបានស្នើឡើងរវាងលោកPutin និងប្រធានាធិបតីអាមេរិកលោក Joe Biden ដែលសម្របសម្រួលដោយប្រទេសបារាំង និងបានព្រមព្រៀងគ្នាកាលពីថ្ងៃអាទិត្យរួចហើយនោះ ឥឡូវនេះទំនងជាមិនអាចកើតឡើងបាននោះទេ៕