ប៉ូលិសហៃទីកាលពីថ្ងៃពុធបានបើកការបាញ់ប្រហារទៅលើក្រុមបាតុករ ដែលទាមទារប្រាក់ឈ្នួលខ្ពស់ ហើយហេតុការណ៍នេះបានសម្លាប់អ្នកកាសែតម្នាក់។ នេះបើយោងតាមសាក្សីនិងគ្រូពេទ្យនៅក្នុងប្រទេស ដែលបានបញ្ជាក់ប្រាប់កាសែតរ៉យទ័រ។
អ្នកកាសែតពីរនាក់ផ្សេងទៀតត្រូវបានបាញ់សម្លាប់នៅកន្លែងកើតហេតុក្នុងទីក្រុង Port-au-Prince ជាកន្លែងដែលប្រជាជនហៃទីរាប់រយនាក់បានប្រមូលផ្តុំគ្នា ដើម្បីទាមទារប្រាក់ឈ្នួលអប្បបរមាខ្ពស់ជាងការអនុម័តក្នុងសប្តាហ៍នេះ ដោយរដ្ឋាភិបាលរបស់លោកនាយករដ្ឋមន្ត្រី Ariel Henry ។
សាក្សីនិងប្រធានសហជីពម្នាក់បាននិយាយថា រថយន្តប៉ូលិសដែលឆ្លងកាត់បានបាញ់ទៅលើហ្វូងបាតុករ។ លោក Dominique St Eloi មេដឹកនាំសហជីពដែលមានវត្តមាននៅក្នុងបាតុកម្មបាននិយាយថា វាមានសភាពស្ងប់ស្ងាត់ នៅពេលដែលប៉ូលីសចាប់ផ្តើមបាញ់ចេញពីរថយន្ត។
ប្រទេសហៃទីកាលពីថ្ងៃចន្ទបានដំឡើងប្រាក់ឈ្នួលអប្បបរមាដល់ទៅ ៥៤% បន្ទាប់ពីការធ្វើបាតុកម្មជាច្រើនសប្តាហ៍ដោយកម្មករកាត់ដេរ ដែលពួកគេបាននិយាយថា ប្រាក់ឈ្នួលរបស់ពួកគេមិនគ្រប់គ្រាន់សម្រាប់ចំណាយ ដោយសារតែតម្លៃផ្សេងៗក៏បានកើនឡើងផងដែរ។
ក្រុមអ្នកតវ៉ាកាលពីថ្ងៃពុធ ភាគច្រើនមកពីវិស័យកាត់ដេរ ដែលនាំចេញផលិតផលសម្រេចទៅកាន់អ្នកលក់រាយរបស់សហរដ្ឋអាមេរិក។ កម្មករទាំងនោះទទួលបានការដំឡើងប្រាក់ឈ្នួល ៣៧% ដែលធ្វើឱ្យប្រាក់ឈ្នួលរបស់ពួកគេស្ថិតក្រោម ៧,៥០ ដុល្លារក្នុងមួយថ្ងៃ ដែលទាបជាងការទាមទារ។
អ្នកកាសែតឈ្មោះ Lazzare Maxihen ដែលធ្វើការឱ្យក្រុមប្រព័ន្ធផ្សព្វផ្សាយហៃទី Roi des Infos បានទទួលមរណភាពដោយរបួសនៅឯមន្ទីរពេទ្យកាលពីថ្ងៃពុធ។ នេះបើយោងតាមគ្រូពេទ្យម្នាក់ដែលសុំមិនបញ្ចេញអត្តសញ្ញាណ។
បន្ទាប់ពីហេតុការណ៍នេះ លោកនាយករដ្ឋមន្ត្រីបានថ្កោលទោសចំពោះអំពើឃោរឃៅ ហើយបានសន្យាការពារបាតុកម្មដោយសន្តិវិធី។ លោក Henry បានសរសេរសារនៅលើប្រព័ន្ធបណ្ដាញសង្គម Twitter ថា៖ “រដ្ឋាភិបាលបញ្ជាក់ជាថ្មីនូវការទទួលខុសត្រូវរបស់អាជ្ញាធរសាធារណៈក្នុងការធានាសណ្តាប់ធ្នាប់ និងសន្តិសុខ”។មកទល់ពេលនេះ គេពុំទាន់ដឹងពីមូលហេតុនៃការបាញ់បោះនេះនៅឡើយទេ ខណៈអ្នកនាំពាក្យប៉ូលិសជាតិហៃទីមិនបានឆ្លើយតបភ្លាមៗចំពោះសំណើសុំការអត្ថាធិប្បាយ៕
