សហភាពអឺរ៉ុបនិយាយថា ខ្លួននឹងឱ្យរុស្ស៊ីទទួលខុសត្រូវចំពោះការវាយប្រហារលើអ៊ុយក្រែន

លោកស្រី Ursula von der Leyen ប្រធានគណៈកម្មការប្រតិបត្តិរបស់សហភាពអឺរ៉ុប បាននិយាយកាលពីថ្ងៃព្រហស្បតិ៍ថា សហភាពអឺរ៉ុបនឹងឱ្យក្រុងម៉ូស្គូទទួលខុសត្រូវចំពោះការវាយប្រហារយ៉ាង “អយុត្តិធម៌” លើអ៊ុយក្រែន។

លោកស្រីបានបង្ហោះសារនៅលើប្រព័ន្ធបណ្ដាញសង្គម Twitter ថា៖ “នៅក្នុងពេលវេលាដ៏តានតឹងនេះ យើងឈរជាមួយអ៊ុយក្រែននិង ស្ដ្រី បុរស និងកុមារស្លូតត្រង់ទាំងឡាយ ដែលនៅពេលនេះ ពួកគេប្រឈមមុខនឹងការវាយប្រហារនិងព្រួយបារម្ភពីសុវត្ថិភាពរបស់ពួកគេ”។

លោកស្រី von der Leyen បានបន្ថែមថា៖ “យើងនឹងធ្វើឱ្យវិមានក្រឹមឡាំងទទួលខុសត្រូវ”។មេដឹកនាំសហភាពអឺរ៉ុប គ្រោងនឹងរៀបចំកិច្ចប្រជុំកំពូលជាបន្ទាន់នៅទីក្រុងប្រ៊ុចសែល នៅថ្ងៃព្រហស្បតិ៍ បន្ទាប់ពីជុំទីមួយនៃទណ្ឌកម្មរបស់សហភាពអឺរ៉ុបលើប្រទេសរុស្ស៊ីបានចូលជាធរមានកាលពីថ្ងៃពុធ។

គួរបញ្ជាក់ផងដែរថា ក្រុមមន្ត្រីនិងប្រព័ន្ធផ្សព្វផ្សាយបានរាយការណ៍ថា កងកម្លាំងរុស្ស៊ីបានបាញ់មីស៊ីលទៅកាន់ទីក្រុងជាច្រើនរបស់អ៊ុយក្រែន ហើយកងទ័ពត្រូវបានពង្រាយនៅឆ្នេរសមុទ្រភាគខាងត្បូងរបស់ខ្លួនកាលពីថ្ងៃព្រហស្បតិ៍ បន្ទាប់ពីប្រធានាធិបតីរុស្ស៊ី លោក វ្ល៉ាឌីមៀ ពូទីន បានបើកភ្លើងខៀវឱ្យមានប្រតិបត្តិការយោធាពិសេសនៅភាគខាងកើត៕