អន្តរជាតិ៖អគ្គលេខាធិការអង្គការសហប្រជាជាតិលោក Antonio Guterres កាលពីថ្ងៃពុធបានថ្កោលទោសយ៉ាងខ្លាំងចំពោះការចាប់ខ្លួនសមាជិកចំនួន 4 នាក់នៃបេសកកម្មរក្សាស្ថិរភាពចម្រុះរបស់អង្គការសហប្រជាជាតិនៅសាធារណរដ្ឋអាហ្វ្រិកកណ្តាល (MINUSCA) ហើយបានអំពាវនាវឱ្យមានការដោះលែងពួកគេជាបន្ទាន់។កងរក្សាសន្តិភាពរបស់អង្គការសហប្រជាជាតិត្រូវបានចាប់ខ្លួនដោយកងអាវុធហត្ថសាធារណៈរដ្ឋអាហ្រ្វិកកណ្តាល (CAR) នៅទីក្រុង Bangui កាលពីថ្ងៃចន្ទ ខណៈពេលដែលអមដំណើរមន្ត្រីយោធាជាន់ខ្ពស់នៃបេសកកម្ម។
អគ្គលេខាធិការបានសង្កត់ធ្ងន់ថា យោងតាមកិច្ចព្រមព្រៀងស្ថានភាពកងកម្លាំងឆ្នាំ2014 រវាងអង្គការសហប្រជាជាតិ និងរដ្ឋាភិបាលនៃCAR ទាក់ទងនឹងបេសកកម្ម, សមាជិក MINUSCA ទាំងនេះទទួលបានឯកសិទ្ធិនិងអភ័យឯកសិទ្ធិដែលជាផលប្រយោជន៍របស់អង្គការសហប្រជាជាតិ។
មន្ត្រីជាន់ខ្ពស់អង្គការសហប្រជាជាតិរូបនេះបានរំលឹកថា កិច្ចព្រមព្រៀងស្ថានភាពកងកម្លាំងឆ្នាំ 2014 បានបង្កើតនីតិវិធីជាក់លាក់មួយ ក្នុងករណីដែលសមាជិកនៃ MINUSCA ត្រូវបានសង្ស័យដោយអាជ្ញាធរនៃ CAR ថាបានប្រព្រឹត្តបទល្មើស។លោក អគ្គលេខាធិការបានកត់សម្គាល់ថា នីតិវិធីនេះមិនត្រូវបានអនុវត្តក្នុងករណីបច្ចុប្បន្ននេះទេ។លោក Guterres បានអំពាវនាវដល់រដ្ឋាភិបាលនៃ សាធារណៈរដ្ឋអាហ្រ្វិកកណ្តាលឱ្យគោរពតាមកាតព្វកិច្ចទាំងអស់របស់ខ្លួនក្រោមច្បាប់អន្តរជាតិ រួមទាំងកិច្ចព្រមព្រៀងស្ថានភាពនៃកងកម្លាំង ហើយដោះលែងបុគ្គលិក MINUSCA ទាំងនេះ “ដោយគ្មានលក្ខខណ្ឌ និងដោយគ្មានការពន្យារពេល”៕
