កោះតៃវ៉ាន់នឹងចូលដៃជាមួយប្រទេសប្រជាធិបតេយ្យដើម្បីដាក់ទណ្ឌកម្មលើរុស្ស៊ី

កោះតៃវ៉ាន់បាននិយាយកាលពីថ្ងៃសុក្រថា ខ្លួននឹងចូលរួមជាមួយបណ្តាប្រទេសប្រជាធិបតេយ្យ ដើម្បីដាក់ទណ្ឌកម្មលើប្រទេសរុស្ស៊ី ជុំវិញការឈ្លានពានអ៊ុយក្រែន ដោយក្នុងនោះ ក្រុមហ៊ុនផលិតបន្ទះឈីបដ៏ធំជាងគេបំផុតរបស់ពិភពលោកឈ្មោះ TMSC បានបន្ថែមថា ខ្លួននឹងអនុលោមតាមច្បាប់គ្រប់គ្រងការនាំចេញ។

លោកនាយករដ្ឋមន្ត្រី Su Tseng-chang បានប្រាប់អ្នកយកព័ត៌មាននៅទីក្រុងតៃប៉ិដោយមិនបានផ្តល់ព័ត៌មានលម្អិតថា៖ “យើងថ្កោលទោសយ៉ាងធ្ងន់ធ្ងរចំពោះទង្វើនៃការឈ្លានពានបែបនេះ ហើយនឹងចូលរួមជាមួយប្រទេសប្រជាធិបតេយ្យ ដើម្បីរួមគ្នាដាក់ទណ្ឌកម្ម”។

រដ្ឋមន្ត្រីក្រសួងសេដ្ឋកិច្ចតៃវ៉ាន់ លោកស្រី Wang Mei-hua បាននិយាយថា កោះនេះនឹងពិនិត្យយ៉ាងតឹងរ៉ឹងលើ ការនាំចេញទៅកាន់ប្រទេសរុស្ស៊ី និងសម្របសម្រួលជាមួយសម្ព័ន្ធមិត្ត ប៉ុន្ដែលោកស្រី​ក៏​មិន​បាន​បញ្ជាក់​លម្អិតអំពីសកម្មភាពបន្ថែមទៀតផងដែរ។

ក្រសួងការបរទេសតៃវ៉ាន់បានបញ្ជាក់នៅក្នុងសេចក្តីថ្លែងការណ៍មួយថា កោះដែលជាគន្លឹះនៃខ្សែសង្វាក់ផ្គត់ផ្គង់ ឧបករណ៍បន្ទះឈីប Semiconductor សកលនឹងសម្របសម្រួលយ៉ាងជិតស្និទ្ធជាមួយសហរដ្ឋអាមេរិក និងប្រទេសដែលមានគោលជំហរដូចគ្នា ដើម្បីអនុម័តវិធានការសមស្របក្នុងគោលបំណងរំដោះអ៊ុយក្រែនពីសង្រ្គាម។

នៅពេលសួរអំពីទណ្ឌកម្មនេះ ក្រុមហ៊ុន Taiwan Semiconductor Manufacturing Co Ltd (TSMC) ដែលជាក្រុមហ៊ុនផ្គត់ផ្គង់ដ៏ធំរបស់ Apple Inc និងជាក្រុមហ៊ុនចុះបញ្ជីមានតម្លៃបំផុតរបស់អាស៊ី បាននិយាយថា ខ្លួននឹងអនុវត្តតាមច្បាប់ត្រួតពិនិត្យការនាំចេញ។

ក្នុងសេចក្ដីថ្លែងការណ៍មួយ TSMC បានបញ្ជាក់ថា៖ “ក្រុមហ៊ុនអនុលោមតាមច្បាប់ និងបទប្បញ្ញត្តិជាធរមានទាំងអស់ ហើយប្តេជ្ញាចិត្តយ៉ាងពេញលេញក្នុងការអនុលោមតាមច្បាប់ត្រួតពិនិត្យការនាំចេញថ្មីដែលបានប្រកាស”។

សេចក្ដីថ្លែងការណ៍បានបន្ដថា៖ “ក្រុមហ៊ុនក៏មានប្រព័ន្ធត្រួតពិនិត្យការនាំចេញយ៉ាងម៉ត់ចត់ផងដែរ រួមទាំងដំណើរការវាយតម្លៃ និងត្រួតពិនិត្យដ៏រឹងមាំ ដើម្បីធានាបាននូវការរឹតបន្តឹងការត្រួតពិនិត្យការនាំចេញ”។

គួរបញ្ជាក់ផងដែរថា រុស្ស៊ីមិនមែនជាទីផ្សារសំខាន់សម្រាប់ទំនិញរបស់តៃវ៉ាន់ទេ។ ទិន្នន័យរបស់រដ្ឋាភិបាលបានបង្ហាញថា ពាណិជ្ជកម្មរបស់តៃវ៉ាន់ជាមួយអ៊ុយក្រែននិងរុស្ស៊ីនីមួយៗមានតិចជាង ១% នៃចំនួនសរុបរបស់ខ្លួន៕