សហភាពអឺរ៉ុបនឹងបើកកិច្ចប្រជុំកំពូលមួយជាមួយប្រទេសចិននៅថ្ងៃទី១ ខែមេសា ដើម្បីរំសាយភាពតានតឹងដែលកំពុងកើនឡើងរវាងប្លុកនិងប្រទេស។ នេះបើតាមអនុប្រធានគណៈកម្មការអឺរ៉ុប និងប្រធានពាណិជ្ជកម្ម EU លោក Valdis Dombrovskis ដែលបានលើកឡើង កាលពីថ្ងៃចន្ទ។
លោក Dombrovskis បានប្រាប់គណៈកម្មាធិការពាណិជ្ជកម្មនៃសភាអឺរ៉ុបថា៖ “យើងដឹងថាយើងស្ថិតក្នុងដំណាក់កាលដ៏ស្មុគស្មាញនៃទំនាក់ទំនងជាមួយប្រទេសចិន”។
លោក Dombrovskis បានសំដៅទៅលើកិច្ចព្រមព្រៀងវិនិយោគមួយ ដែលបានជាប់គាំងបន្ទាប់ពីទីក្រុងប៉េកាំងបានដាក់ទណ្ឌកម្មលើសមាជិកសភាមួយចំនួន និងជម្លោះរវាងចិននិងលីទុយអានី ដែលក្រោយមកមានការបង្កើតស្ថានទូតរបស់តៃវ៉ាន់នៅឯលីទុយអានី។
លោក Dombrovskis បាននិយាយថា៖ “វាច្បាស់ណាស់ថា ប្រធានបទមួយចំនួនចាំបាច់ត្រូវដោះស្រាយនៅកម្រិតនយោបាយខ្ពស់បំផុត ដើម្បីមើលថាតើយើងអាចកែលម្អកិច្ចសហប្រតិបត្តិការរបស់យើងដល់កម្រិតណា”។
មន្ត្រីសហភាពអឺរ៉ុបម្នាក់បានឱ្យដឹងថា ជំនួបកំពូលទំនងជាមានលក្ខណៈអនឡាញជាជាងជួបផ្ទាល់។
សហភាពអឺរ៉ុបចាត់ទុកប្រទេសចិនជាគូប្រជែងយុទ្ធសាស្ត្រក្នុងវិស័យមួយចំនួន ប៉ុន្តែជាដៃគូក្នុងវិស័យដូចជាការប្រយុទ្ធប្រឆាំងនឹងការប្រែប្រួលអាកាសធាតុ។ ខ្លួនក៏មានបំណងចង់ឱ្យប្រទេសចិនដើរស្របគ្នាក្នុងការធ្វើកំណែទម្រង់ច្បាប់ពាណិជ្ជកម្មនៅអង្គការពាណិជ្ជកម្មពិភពលោកផងដែរ។
លោក Dombrovskis មិនបាននិយាយថាតើប្រធានបទការឈ្លានពានរបស់រុស្ស៊ីលើអ៊ុយក្រែននឹងមាននៅក្នុងកិច្ចប្រជុំកំពូលនាពេលខាងមុខទេ ប៉ុន្តែបានទទួលស្គាល់ថាមានហានិភ័យ ដែលចិននិងរុស្ស៊ីអាចកាន់ដៃគ្នា។
រដ្ឋមន្ត្រីក្រសួងពាណិជ្ជកម្មចិន លោក Wang Wentao បានថ្លែងថា វាជារឿងធម្មតាទេ ដែលមានភាពខុសប្លែកគ្នា ខណៈដែលប្រទេសចិន និងសហភាពអឺរ៉ុប ស្ថិតក្នុងដំណាក់កាលអភិវឌ្ឍន៍ផ្សេងៗគ្នា។ លោកបានបញ្ជាក់ថា ការអភិវឌ្ឍរបស់ចិនគឺជាឱកាស មិនមែនជាឧបសគ្គឡើយដល់សហភាពអឺរ៉ុបឡើយ៕
