ភ្នំពេញ ៖ ទុស្សេចរន្តអគ្គិសនីឆាបឆេះខ្សែភ្លើងបណ្តាលឲ្យដាច់ធ្លាក់រប៉ាត់រប៉ាយពេញផ្លូវ ផ្អើលសមត្ថកិច្ច ពលរដ្ឋយកបំពង់ពន្លត់អគ្គិភ័យបាញ់ និងរថយន្តពន្លត់អគ្គិភ័យ ចេញទៅជួយបាញ់ភ្លើង សំណាងល្អមិនរាលដល់ផ្ទះប្រជាពលរដ្ឋ។
ហេតុនេះបង្កការភ្ញាក់ផ្អើលកាលពីវេលាម៉ោង១១នឹង០០នាទីព្រឹក ថ្ងៃទី០៣ ខែមិនា ឆ្នាំ២០២២ នៅតាមផ្លូវបេតុងអង្គតាមុិញ ភូមិទ្រង់មាន់ សង្កាត់អូរបែកក្អម ខណ្ឌសែនសុខ ។
តាមប្រភពព័ត៍មានពីប្រជាពលរដ្ឋដែលនៅកន្លែងកើតហេតុបានឲ្យដឹងថា មុនកើតហេតុ មានជនជាតិចិនម្នាក់ សង្ស័យផ្ទះរបស់គាត់ដាច់ចរន្តភ្លើង ក៏បានដើរនិងយកឈើទៅឆ្គឹះឌែសង់ទ័រ នៅប្រអប់ភ្លើងលើបង្គោល កន្លែងកើតហេតុ ស្រាប់តែផ្ទុះហុយផ្សែងឆេះតែម្តង រួចរាលឆេះដល់ខ្សែកាបចម្រុះ ខ្សែអុបទិច ភ្លើងឆេះដាច់ធ្លាក់រាយប៉ាយ ផ្អើលប្រជាពលរដ្ឋនៅក្បែរនោះយកបំពង់ពន្លត់អគ្គិភ័យបាញ់ពន្លត់ភ្លើង រហូតដល់រថយន្តពន្លត់អគ្គិភ័យមួយគ្រឿង ចេញទៅអន្តរាគមន៍បាញ់ពន្លត់ ទើបភ្លើងរលត់ទៅវិញ ។
អគ្គិភ័យឆាបឆេះខ្សែភ្លើង ខ្សែកាបចម្រុះ ផ្តើមចេញពីទុស្សេចរន្ត តែមិនបង្កឲ្យអ្នកណារងរបួស ឆេះប៉ះពាល់ដល់ផ្ទះពលរដ្ឋដែរ តែខ្សែភ្លើង ខ្សែកាបជាច្រើន ត្រូវបានឆេះដាច់ធ្លាក់ពេញផ្លូវ ៕
