ប្រធានាធិបតីបារាំង លោក Emmanuel Macron កាលពីថ្ងៃពុធបានលើកឡើងពី “ការភូតកុហក” ដែលបានផ្សព្វផ្សាយដោយរដ្ឋាភិបាលរុស្ស៊ី ដើម្បីបង្ហាញអំពីភាពត្រឹមត្រូវនៃសង្រ្គាមនៅអ៊ុយក្រែន ប៉ុន្តែមេដឹកនាំរូបនេះបាននិយាយថា លោកនឹងនៅតែបន្ដទាក់ទងជាមួយលោកប្រធានាធិបតី វ្លាឌីមៀ ពូទីន ដើម្បីព្យាយាមស្វែងរកនិងបង្កើតបទឈប់បាញ់។
លោក Macron ដែលបានដឹកនាំកិច្ចខិតខំប្រឹងប្រែងរបស់អឺរ៉ុបដើម្បីបញ្ចៀសសង្គ្រាម តាមរយៈការចូលជួបជាមួយលោក ពូទីន នៅទីក្រុងមូស្គូ កាលពីខែមុននិងការសម្របសម្រួលតាមទូរស័ព្ទរវាងប្រធានាធិបតីអ៊ុយក្រែនលោក Volodymyr Zelenskiy បានស្ដីបន្ទោសរុស្ស៊ីចំពោះអរិភាពនេះ។
លោក Macron បានថ្លែងនៅក្នុងសុន្ទរកថាមួយទៅកាន់ប្រជាជនបារាំង ដោយបានសរសើរនិងសាទរ លោក Zelenskiy ថាជាគំរូនៃ “កិត្តិយស សេរីភាព និងភាពក្លាហាន” ហើយបានសង្កត់ធ្ងន់ទៅលើលោក ពូទីន ថាបានបំពានការប្តេជ្ញាចិត្តអន្តរជាតិម្ដងមួយៗ តាមរយៈការជ្រើសរើសសង្គ្រាម។
លោកបានមានប្រសាសន៍ថា៖ “សង្រ្គាមនេះមិនមែនជាជម្លោះរវាងលោកខាងលិច និងរុស្ស៊ីដូចដែលអ្នកខ្លះចង់ឱ្យយើងជឿឡើយ។ គ្មានមូលដ្ឋានអង្គការណាតូនៅអ៊ុយក្រែននោះទេ។ ទាំងនេះគឺជាការកុហក។ រុស្ស៊ីគឺជាអ្នកឈ្លានពាន។ នេះមិនមែនជាសង្គ្រាមប្រឆាំងណាហ្ស៊ីនិយមទេ ប៉ុន្ដែវាគឺជាការកុហក”។រុស្ស៊ីបាននិយាយថា ខ្លួនកំពុងធ្វើប្រតិបត្តិការយោធាពិសេសមួយក្នុងគោលបំណងរំសាយអាវុធនៅអ៊ុយក្រែន និងចាប់«ក្រុមណាហ្ស៊ី» ដែលលោក ពូទីន បាននិយាយថា ក្រុមនេះកំពុងគ្រប់គ្រងប្រទេស។
គួរបញ្ជាក់ផងដែរថា ការបោះឆ្នោតជ្រើសរើសប្រធានាធិបតីបារាំងនឹងធ្វើឡើងក្នុងពេលយ៉ាងខ្លីខាងមុខនេះ ខណៈលោក Macron បានគូសបញ្ជាក់ថា លោកនឹងបន្តការពារតម្លៃនិងជំហររបស់ប្រទេសបារាំងនៅក្នុងពិភពលោក៕
