ថ្លែងពីឃ្លាំងមួយក្នុងទីក្រុង Warsaw ប្រទេសប៉ូឡូញ ជាកន្លែងដែលអង្គការសុខភាពពិភពលោក (WHO) កំពុងសម្របសម្រួលការផ្តល់ជំនួយផ្នែកវេជ្ជសាស្រ្តចំនួន៣៦តោនទៅកាន់ប្រទេសអ៊ុយក្រែន នាយកអង្គការ WHO ប្រចាំទ្វីបអឺរ៉ុបលោក Hans Kluge បានព្រមានថា រលកបន្ទាប់នៃជនភៀសខ្លួនទំនងជាងាយរងគ្រោះដោយសារជំងឺនិងបញ្ហាសេដ្ឋកិច្ច ខ្លាំងជាមនុស្សមួយលានដំបូងដែលបានគេចចេញពីប្រទេសរួច ក្រោយពេលរុស្ស៊ីបានចាប់ផ្ដើមឈ្លានពាន។
លោក Kluge បាននិយាយថា នៅពេលដែលរុស្ស៊ីបង្កើនការវាយប្រហាររបស់ខ្លួនទៅលើទីក្រុងធំៗ ប្រជាជនអ៊ុយក្រែនដែលមានធនធានតិចនិងសុខភាពខ្សោយ ដែលនឹងត្រូវការការគាំទ្រច្រើននឹងត្រូវបង្ខំចិត្តធ្វើដំណើរដ៏គ្រោះថ្នាក់ទៅកាន់ព្រំដែន។ លោកបារម្ភថា ពួកគេអាចប្រឈមនឹងការខ្វះខាតសម្ភារពេទ្យ និងការថែទាំសង្គ្រោះបន្ទាន់។
ការអត្ថាធិប្បាយរបស់ Kluge កើតឡើងនៅពេលដែលមន្ត្រីមកពីប្រទេសរុស្ស៊ី និងអ៊ុយក្រែនបាននិយាយថា ពួកគេបានយល់ព្រមបង្កើតច្រករបៀងមនុស្សធម៌សម្រាប់ការផ្តល់ជំនួយ និងមានសក្តានុពលក្នុងការជំរុញឱ្យមានបទឈប់បាញ់នៅក្នុងតំបន់មួយចំនួន ដើម្បីជួយជនភៀសខ្លួន។
ជំនួយរបស់អង្គការសុខភាពពិភពលោក ដែលត្រូវបានប្រគល់ទៅឱ្យប្រទេសប៉ូឡូញកាលពីថ្ងៃព្រហស្បតិ៍ នឹងផ្លាស់ទីទៅកាន់ទីក្រុង Lviv របស់អ៊ុយក្រែនជាមុនសិន ហើយបន្ទាប់មកចូលទៅក្នុងតំបន់ជម្លោះចាប់ពីថ្ងៃសុក្រ។ វារួមបញ្ចូលទាំងឧបករណ៍ព្យាបាលរបួសសម្រាប់មនុស្ស ១,០០០ នាក់ ក៏ដូចជាការថែទាំវេជ្ជសាស្រ្តផ្សេងទៀតសម្រាប់មនុស្សរហូតដល់ ១៥ម៉ឺននាក់ រួមទាំងថ្នាំមហារីក និងអាំងស៊ុយលីនសម្រាប់អ្នកជំងឺទឹកនោមផ្អែមផងដែរ៕
