គណៈកម្មការសហព័ន្ធកីឡាបាល់ទាត់ទ្វីបអឺរ៉ុប(UEFA) បានជួបប្រជុំនាថ្ងៃនេះ និងបានឈានដល់ការសម្រេចឲ្យក្លិបបាល់ទាត់ និងក្រុមជម្រើសជាតិ បេឡារុស ទាំងអស់ដែលត្រូវចូលប្រកួតក្នុងការប្រកួតដែលរៀបចំឡើងដោយ UEFA ត្រូវស្វែងរកទីតាំងប្រកួតមួយផ្សេងបើសិនខ្លួនឯងជាម្ចាស់ផ្ទះ ដោយមិនអនុញ្ញាតឲ្យរៀបចំការប្រកួតនៅក្នុងទឹកដីប្រទេស បេឡារុស ឡើយ។
ជាងនេះទៅទៀតUEFA ក៏នឹងមិនអនុញ្ញាតឲ្យមានទស្សនិកជនចូលរួមទស្សនាក្នុងការប្រកួតដែលខាង បេឡារុសជាម្ចាស់ផ្ទះនោះដែរ។
ការរឹតបន្តឹងនេះបានកើតឡើងដោយសារ ប្រធានាធិបតី បេឡារុស លោក Alexander Lukashenko បានប្រកាសគាំទ្រ សហព័ន្ធរុស្សី ឲ្យមានការធ្វើសង្គ្រាមយោធាទៅលើប្រទេសអ៊ុយក្រែន។
គួរបញ្ជាក់ផងដែរថា ក្រុមជម្រើសជាតិនិងក្លឹបនៅរុស្ស៊ីត្រូវខាង UEFA និង FIFA បានដាក់បំរាមមិនឲ្យចូលលេងគ្រប់ការប្រកួតទាំងអស់បន្ទាប់ពី ក្រុមជម្រើសជាតិស៊ុយអែត, ប៉ូឡូញ, ឆេក និង អង់គ្លេស បានធ្វើពហិការមិនចូលប្រកួតជាមួយពួកគេ៕
