ដោយ រតនា
ភ្នំពេញ៖ ជនជាតិបរទេសប្រុសស្រីប្រមាណជា២០នាក់ ត្រូវបានកម្លាំងកងរាជអាវុធហត្ថរាជធានីភ្នំពេញធ្វើការឃាត់ខ្លួន នៅទីតាំងហាងម៉ាស្សាមួយកន្លែង ស្លាកយីហោជាអក្សរចិន ប្រែថា ( ឈូងសាមុទ្រក្រអូប ) កាលពីវេលាម៉ោង១២រំលងអធ្រាត្រ ឈានចូលថ្ងៃទី៦ ខែមីនា ឆ្នាំ២០២២ ស្ថិតនៅហាងម៉ាស្សា ដែលមានស្លាកយីហោចិន ស្ថិតតាមបណ្តោយផ្លូវ១៧២ សង្កាត់ផ្សារថ្មី៣ ខណ្ឌដូនពេញ រាជធានីភ្នំពេញ។
សូមបញ្ជាក់ថា កម្លាំងកងរាជអាវុធហត្ថបានចុះធ្វើការត្រួតពិនិត្យនៅផ្នែកខាងក្នុង និងធ្វើការរុំព័ទ្ធនូវខ្សែររង្វង់ប្រតិបត្តិការណ៍ ដោយយករថយន្តមកចំនួន៣គ្រឿងនៅផ្នែកខាងក្រៅ រួមមានដូចជារថយន្តទ្រុងដែក រថយន្តក្រុងខ្នាតតូចនៃកងរាជអាវុធហត្ថ និងរថយន្តសង្គ្រោះនៃកងរាជអាវុធហត្ថរាជធានីភ្នំពេញ ។
នៅមុនពេលចុះឡោមព័ទ្ធទីតាំងខាងលើ កម្លាំងកងរាជអាវុធហត្ថបានធ្វើការស្រាវជ្រាវ ដើម្បីកំណត់ឲ្យបានច្បាស់នូវមុខសញ្ញានៃបទល្មើស រហូតឈានដល់ការបើកប្រតិតបត្តិការផងតែម្តង។ ការចុះឡោមព័ទ្ធខាងលើនេះ បានបញ្ជាប់នូវម៉ោង១២និង៣០នាទីរំលងអធ្រាត្រ ឈានចូលថ្ងៃទី៦ ខែមីនា ឆ្នាំ២០២២ ដោយឃាត់ខ្លួនមនុស្សប្រុសស្រី ជាជនជាតិបរទេសប្រមាណ២០នាក់ រួមទាំងសម្ភារៈប្រើប្រាស់មួយចំនួនដែលមាននៅក្នុងហាងម៉ាស្សាខាងលើ មូលហេតុ “សង្ស័យពាក់ព័ន្ធលួចបង្កប់នូវសេវាកម្មផ្លូវភេទ” ។
ក្រោយពេលប្រតិបត្តិការណ៍ចប់ កម្លាំងកងរាជអាវុធហត្ថ បាននាំខ្លួនមនុស្សប្រុសស្រីទាំងនេះ ទៅកាន់មូលដ្ឋានកងរាជអាវុធហត្ថរាជធានីភ្នំពេញ ដើម្បីធ្វើការសួរនាំ និងចាត់ការទៅតាមនីតិវិធីច្បាប់ជាបន្តទៀត៕
