នាយករដ្ឋមន្ត្រីចក្រភពអង់គ្លេស លោក Boris Johnson បានអំពាវនាវឱ្យមាន “ជំហ៊ានជាបន្ដបន្ទាប់” ដើម្បីងាកចេញពីការពឹងផ្អែកលើប្រេងនិងឧស្ម័នរបស់រុស្ស៊ី ដែលកំពុងលុកលុយអ៊ុយក្រែន។
បន្ទាប់ពីកិច្ចពិភាក្សាជាមួយនាយករដ្ឋមន្ត្រីកាណាដានិងហូឡង់ លោក Johnson បាននិយាយថា ប្រជាជាតិនានាត្រូវតែធ្វើការជាមួយគ្នាដើម្បីបង្កើតជម្រើសផ្សេងទៀត។
ដោយឡែក នាយករដ្ឋមន្ត្រីកាណាដា លោក Justin Trudeau បាននិយាយថា អឺរ៉ុបមិនចង់ឱ្យមានកំហុសម្ដងទៀតរបស់ខ្លួន ដែលពឹងផ្អែកខ្លាំងលើរុស្ស៊ីនោះទេ។
ប៉ុន្តែ លោកនាយករដ្ឋមន្ត្រីហូឡង់ Mark Rutte បានព្រមានថា ការបង្ខំឱ្យធ្វើពហិការពេលនេះនឹងមាន “ផលវិបាកយ៉ាងសម្បើម”។ ចំណែកឯនៅប្រទេសអាល្លឺម៉ង់ លោកអធិការបតី Olaf Scholz បានព្រមានពីការហាមឃាត់ប្រេង និងឧស្ម័នរបស់រុស្ស៊ី។
នៅក្នុងសេចក្តីថ្លែងការណ៍មួយ លោកបាននិយាយថា អឺរ៉ុបបាន “លើកលែងប្រេងនិងឧស្ម័នរបស់រុស្ស៊ីដោយចេតនា” ពីការដាក់ទណ្ឌកម្ម ដោយសារតែមិនទាន់មានវិធីសាស្ដ្រផ្សេងក្នុងការផ្គត់ផ្គង់បាននៅពេលនេះ។
ទន្ទឹមនេះ រុស្ស៊ីបានព្រមានថា តម្លៃប្រេងអាចឡើងដល់ ៣០០ ដុល្លារក្នុងមួយបារ៉ែល ហើយខ្លួនអាចនឹងបិទបំពង់បង្ហូរឧស្ម័នសំខាន់ទៅកាន់ប្រទេសអាល្លឺម៉ង់ ប្រសិនបើលោកខាងលិចបញ្ឈប់ការនាំចូលប្រេង ជុំវិញការឈ្លានពានរបស់ខ្លួនលើអ៊ុយក្រែន៕
