ប្រធានសិទ្ធិមនុស្សរបស់អង្គការសហប្រជាជាតិកាលពីថ្ងៃចន្ទ បានជំរុញឱ្យរដ្ឋាភិបាលរបស់លោក Daniel Ortega ប្រធានាធិបតីនីការ៉ាហ្គា រៀបចំការបោះឆ្នោតឡើងវិញដោយយុត្តិធម៌ ហើយបាននិយាយថា លោកស្រី ព្រួយបារម្ភអំពីកង្វះខាតនៃការទទួលខុសត្រូវរបស់ប្រទេស ចំពោះការរំលោភសិទ្ធិមនុស្សម្តងហើយម្តងទៀត។
ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស លោកស្រី Michelle Bachelet នៅក្នុងរបាយការណ៍មួយ បានស្នើសុំឱ្យលោក Ortega ធានាបាននូវ “ដំណើរការបោះឆ្នោតដែលអាចជឿទុកចិត្តបាន និងប្រកបដោយយុត្តិធម៌ និងតម្លាភាព” នៅក្នុងការបោះឆ្នោតថ្នាក់តំបន់ដែលគ្រោងធ្វើនៅចុងឆ្នាំនេះ។
លោកស្រី Bachelet ដែលធ្លាប់ជាប្រធានាធិបតីនៃប្រទេសឈីលីពីឆ្នាំ២០១៤ ដល់ឆ្នាំ២០១៨ ក៏បានអំពាវនាវឱ្យលោក Ortega ជួបពិភាក្សាជាមួយក្រុមប្រឆាំងផងដែរបន្ទាប់ពីការបោះឆ្នោត ដែលសកម្មភាពនេះត្រូវបានលើកឡើងដោយលោក Ortega ផ្ទាល់កាលពីខែមករាកន្លងទៅ។
លោកស្រី Bachelet បាននិយាយថា៖ “កិច្ចសន្ទនាគួរតែរួមបញ្ចូលរាល់ទស្សនៈ ហើយគួរតែមានគោលបំណងធានានូវដំណោះស្រាយដោយសន្តិវិធីនិងប្រជាធិបតេយ្យ ចំពោះវិបត្តិនយោបាយ សង្គម និងសិទ្ធិមនុស្ស ដែលបន្តជះឥទ្ធិពលយ៉ាងខ្លាំងដល់ប្រទេស”។
អង្គការសិទ្ធិមនុស្សអន្តរជាតិបានជំរុញឱ្យលោក Ortega រៀបចំការសន្ទនាជាតិ និងដោះលែងមនុស្ស ដែលក្រុមប្រឆាំងហៅថា “អ្នកទោសនយោបាយ”។
នៅក្នុងរបាយការណ៍ដដែល លោកស្រី Bachelet បានបន្ដថា ការិយាល័យរបស់លោកស្រីបានចងក្រងសំណុំរឿងចំនួនបួននៃអ្នកការពារសិទ្ធិមនុស្សដែលត្រូវបានឃុំខ្លួនតាមអំពើចិត្តនៅក្នុងប្រទេស ហើយរាប់សិបនាក់ផ្សេងទៀតត្រូវបានជាប់ពន្ធនាគារដោយគ្មានដំណើរការតាមតុលាការត្រឹមត្រូវ ដោយសារតែបរិបទនៃការបោះឆ្នោតឆ្នាំ២០២១។
ជាការឆ្លើយតប រដ្ឋាភិបាលនីការ៉ាហ្គាបានបញ្ជាក់នៅក្នុងសេចក្តីថ្លែងការណ៍មួយថា៖ “ប្រភេទនៃរបាយការណ៍ទាំងនេះមានគោលបំណងបន្តការដកសិទ្ធិនិងបរិហារដល់អាជ្ញាធរ និងស្ថាប័នជាតិរបស់យើង ក៏ដូចជាប្រព័ន្ធច្បាប់ដែលគាំទ្ររដ្ឋនីការ៉ាហ្គា ដោយផ្អែកលើព័ត៌មានមិនពិត និងលំអៀងទាំងស្រុង ក្នុងគោលបំណងជ្រៀតជ្រែកកិច្ចការរបស់យើង មិនគោរពអធិបតេយ្យភាព និងឯករាជ្យភាពរបស់យើង”៕
