Fitch Ratings ទីភ្នាក់ងារវាយតម្លៃឈានមុខគេមួយ បានព្រមានថា ប្រទេសរុស្ស៊ីទំនងជានឹងមិនអាចទូទាត់សងបំណុលរបស់ខ្លួនក្នុងពេលឆាប់ៗនេះ ខណៈដែលទីភ្នាក់ងារនេះបានបន្ទាបតម្លៃមូលបត្របំណុលរបស់រុស្ស៊ីកាន់តែខ្លាំង។
Fitch Ratings បានកាត់បន្ថយការវាយតម្លៃរបស់ខ្លួនលើប្រទេសរុស្ស៊ីស្ទើតែដល់បាតតារាង ត្រឹមតែប៉ុន្មានថ្ងៃបន្ទាប់ពីការទម្លាក់ចំណាត់ថ្នាក់ជុំវិញស្ថានភាពវិនិយោគ។ វាជាការវាយប្រហារចុងក្រោយបំផុតលើកិត្តិនាមរបស់ប្រទេសក្នុងការទទួលបានឥណទាន បន្ទាប់ពីការលុកលុយនៅអ៊ុយក្រែន។
ក្នុងសប្តាហ៍នេះ ទីក្រុងម៉ូស្គូបាននិយាយថា ការទូទាត់មូលបត្របំណុលរបស់ខ្លួនអាចនឹងរងផលប៉ះពាល់ដោយការដាក់ទណ្ឌកម្ម។ ទីភ្នាក់ងារ Fitch បានឱ្យដឹងថា៖ “ការដាក់ទណ្ឌកម្មបន្ថែមនិងសំណើដែលអាចប៉ះពាល់ដល់វិស័យពាណិជ្ជកម្មបានបង្កើនលទ្ធភាពក្នុងការឆ្លើយតបរបស់រុស្ស៊ីតាមរយៈការដាក់ចេញគោលនយោបាយ ដែលក្នុងនោះអាចរួមមានជម្រើសមិនបង់ប្រាក់ចំពោះកាតព្វកិច្ចបំណុលក្នុងដែនដីរបស់ខ្លួន”។
ការប្រកាសរបស់ Fitch បានធ្វើឡើងបន្ទាប់ពីសហរដ្ឋអាមេរិក និងចក្រភពអង់គ្លេសបាននិយាយថា ពួកគេនឹងហាមឃាត់ប្រេងរបស់រុស្ស៊ី ខណៈដែលពួកគេបង្កើនការឆ្លើយតបផ្នែកសេដ្ឋកិច្ច ចំពោះការលុកលុយលើអ៊ុយក្រែន។
ប្រធានាធិបតីសហរដ្ឋអាមេរិក លោក ចូ បៃឌិន បាននិយាយថាវិធានការនេះបានផ្តោតលើ “សរសៃឈាមសំខាន់នៃសេដ្ឋកិច្ចរបស់រុស្ស៊ី”។ ទន្ទឹមនេះ សហភាពអឺរ៉ុបបានបញ្ជាក់ថា ខ្លួននឹងបញ្ចប់ការពឹងផ្អែកលើឧស្ម័នរបស់រុស្ស៊ី។
ក្នុងនាមជាអ្នកនាំចេញប្រេងដ៏សំខាន់ វិធានការនេះមានគោលបំណងវាយលុកផ្នែកហិរញ្ញវត្ថុរបស់ទីក្រុងម៉ូស្គូ ទោះបីជាអ្នកជំនាញព្រមានថា នេះក៏ទំនងជានឹងធ្វើឱ្យតម្លៃប្រេង និងឧស្ម័នធម្មជាតិឡើងថ្លៃនៅលើទីផ្សារពិភពលោកក៏ដោយ៕
