ក្រុមមន្ត្រីបាននិយាយកាលពីថ្ងៃអង្គារម្សិលមិញថា ភ្ញៀវទេសចររាប់ពាន់នាក់មកពីប្រទេសរុស្ស៊ីបច្ចុប្បន្នកំពុងជាប់គាំងនៅក្នុងប្រទេសថៃ ខណៈដែលទណ្ឌកម្មរបស់លោកខាងលិច ដែលមិនធ្លាប់មានពីមុនមក បានធ្វើឱ្យពលរដ្ឋរុស្ស៊ីពិបាកស្វែងរកជើងហោះហើរ ដើម្បីវិលត្រលប់ទៅប្រទេសវិញ ក៏ដូចជាជួបប្រទះបញ្ហាហិរញ្ញវត្ថុ។
ប្រធានអាជ្ញាធរទេសចរណ៍របស់ប្រទេសថៃបាននិយាយថា ការលុបចោលជើងហោះហើរ បញ្ហារូបិយប័ណ្ណធ្លាក់តម្លៃ និងបញ្ហាក្នុងការទូទាត់ដោយសារតែធនាគាររុស្ស៊ីត្រូវបានកាត់ចេញពីប្រព័ន្ធ SWIFT បានធ្វើឱ្យប្រជាជនរុស្ស៊ីជាង ៧,០០០នាក់ស្ថិតក្នុងស្ថានភាពស្រពិចស្រពិលនៅតាមតំបន់កម្សាន្ដនានាដូចជានៅកោះភូកេត កោះសាមុយ ប៉ាតាយ៉ា និងកោះក្រាប៊ីជាដើម។
លោក Yuthasak Supasorn បានប្រាប់កាសែតរ៉យទ័រថា៖ “យើងត្រូវតែធ្វើជាម្ចាស់ផ្ទះដ៏ល្អ និងថែរក្សាមនុស្សគ្រប់គ្នា។ នៅតែមានអ្នកទេសចររុស្ស៊ីកំពុងធ្វើដំណើរមកប្រទេសថៃ”។
ដោយឡែក ស្ថានទូតរុស្ស៊ីប្រចាំទីក្រុងបាងកក មិនបានឆ្លើយតបភ្លាមៗចំពោះសំណើសុំការអត្ថាធិប្បាយពីពលរដ្ឋខ្លួនឡើយ។
គួរបញ្ជាក់ផងដែរថាក្នុងឆ្នាំ២០១៩កន្លងទៅ ប្រទេសថៃទទួលបានភ្ញៀវរុស្ស៊ីចំនួន ១.៤ លាននាក់។ កាលពីខែមករា ប្រទេសនេះបានទទួលភ្ញៀវពីរុស្ស៊ីប្រហែល ២៣,០០០ នាក់ ដែលស្មើនឹងមួយភាគប្រាំនៃចំនួនអ្នកចូលប្រទេសសរុប។ ប្រហែលពាក់កណ្តាលនៃអ្នកដែលជាប់គាំងគឺស្ថិតនៅលើកោះភូកេត។
ប្រធានសមាគមទេសចរណ៍ភូកេត លោក Bhummikitti Ruktaengam បាននិយាយថា៖ “យើងបានស្នើឱ្យសណ្ឋាគារកាត់បន្ថយតម្លៃ និងបន្តការស្នាក់នៅរបស់ពួកគេ”។
លោកបានបន្ដថា ភ្ញៀវមួយចំនួនបានប្រើប្រាស់ប្រព័ន្ធ UnionPay របស់ប្រទេសចិន បន្ទាប់ពីក្រុមហ៊ុនទូទាត់របស់សហរដ្ឋអាមេរិក Visa និង Mastercard បានផ្អាកដំណើរការកាតដែលចេញដោយធនាគាររុស្ស៊ី។
Visa និង Mastercard បានប្រកាសកាលពីថ្ងៃសៅរ៍ថា ពួកគេកំពុងផ្អាកប្រតិបត្តិការនៅក្នុងប្រទេសរុស្ស៊ី ជុំវិញការឈ្លានពានរបស់ខ្លួនលើអ៊ុយក្រែន។ រុស្ស៊ីបានហៅសកម្មភាពរបស់ខ្លួននៅអ៊ុយក្រែនថាជា “ប្រតិបត្តិការពិសេស”៕
