កូរ៉េខាងជើងនឹងបាញ់បង្ហោះផ្កាយរណប ដើម្បីតាមដានសហរដ្ឋអាមេរិកនិងសត្រូវផ្សេងទៀត

កូរ៉េខាងជើងនឹងបាញ់បង្ហោះផ្កាយរណបឈ្លបយកការណ៍ជាច្រើនក្នុងប៉ុន្មានឆ្នាំខាងមុខ ដើម្បីទទួលបានព័ត៌មានស្របតាមពេលវេលាជាក់ស្តែងអំពីសកម្មភាពយោធារបស់សហរដ្ឋអាមេរិក និងសម្ព័ន្ធមិត្តរបស់ប្រទេសមហាអំណាចនេះ។ នេះបើតាមប្រព័ន្ធផ្សព្វផ្សាយរដ្ឋបានរាយការណ៍កាលពីថ្ងៃព្រហស្បតិ៍ ដោយដកស្រង់សម្ដីរបស់មេដឹកនាំប្រទេស លោក គីម ជុងអ៊ុន។

ទីភ្នាក់ងារសារព័ត៌មានរដ្ឋ KCNA បានរាយការណ៍ថា ខណៈពេលកំពុងត្រួតពិនិត្យរដ្ឋបាលអភិវឌ្ឍន៍លំហអាកាសជាតិរបស់កូរ៉េខាងជើង លោក គីម បាននិយាយថា ផ្កាយរណបឈ្លបយកការណ៍យោធាជាច្រើននឹងត្រូវបាញ់បង្ហោះចូលក្នុងលំហអវកាស។

លោកបានកត់សម្គាល់ថា គោលបំណងនៃការអភិវឌ្ឍនិងប្រតិបត្តិការផ្កាយរណបឈ្លបយកការណ៍យោធា គឺដើម្បីផ្តល់ឱ្យកងកម្លាំងប្រដាប់អាវុធរបស់កូរ៉េខាងជើងនូវព័ត៌មានស្របតាមពេលវេលាជាក់ស្តែងស្តីពីសកម្មភាពយោធារបស់ចក្រពត្តិនិយមអាមេរិក និងកងកម្លាំងដ៏ច្រើននៅក្នុងប្រទេសកូរ៉េខាងត្បូង ប្រទេសជប៉ុន និងតំបន់ប៉ាស៊ីហ្វិក។

អ្នកជំនាញបាននិយាយថា កូរ៉េខាងជើងហាក់ដូចជាកំពុងរៀបចំបាញ់បង្ហោះផ្កាយរណបឈ្លបយកការណ៍ ដែលអាចបង្កឱ្យមានភាពចម្រូងចម្រាសដូចនឹងការសាកល្បងអាវុធនុយក្លេអ៊ែររបស់ប្រទេសនេះផងដែរ ដោយសារតែកូរ៉េខាងជើងប្រើប្រាស់បច្ចេកវិទ្យាមីស៊ីលផ្លោង ដែលត្រូវបានហាមឃាត់ដូចគ្នា។

កូរ៉េខាងជើងនិយាយថា ខ្លួនបានធ្វើការសាកល្បងប្រព័ន្ធផ្កាយរណបចំនួនពីរនៅថ្ងៃទី២៧ ខែកុម្ភៈ និងថ្ងៃទី៥ ខែមីនា។ អាជ្ញាធរនៅកូរ៉េខាងត្បូង ជប៉ុន និងសហរដ្ឋអាមេរិកនិយាយថា ការធ្វើតេស្តនេះពាក់ព័ន្ធនឹងការបាញ់មីស៊ីលផ្លោង។

ការបាញ់បង្ហោះនេះបានទាក់ទាញការថ្កោលទោសពីអន្តរជាតិ ហើយយោធាអាមេរិកបាននិយាយកាលពីថ្ងៃព្រហស្បតិ៍ថា ខ្លួនបានបង្កើនការឃ្លាំមើល និងការប្រមូលព័ត៌មាន។

សហរដ្ឋអាមេរិកក៏បាននិយាយផងដែរថា ខ្លួនបានបង្កើនការត្រៀមខ្លួនការពារមីស៊ីលផ្លោងរបស់កូរ៉េខាងជើង បន្ទាប់ពីក្នុងការសាកល្បងមីស៊ីលរបស់កូរ៉េខាងជើង៕