មេដឹកនាំជប៉ុននិងកូរ៉េខាងត្បូងយល់ព្រមបង្កើនទំនាក់ទំនងជាមួយសហរដ្ឋអាមេរិក ដើម្បីដោះស្រាយបញ្ហាកូរ៉េខាងជើង

នាយករដ្ឋមន្ត្រីជប៉ុន លោក Fumio Kishida និងប្រធានាធិបតីជាប់ឆ្នោតថ្មីកូរ៉េខាងត្បូង លោក Yoon Suk-yeol បាននិយាយថា ពួកគេបានព្រមព្រៀងគ្នាកាលពីថ្ងៃសុក្រ ដើម្បីពង្រឹងទំនាក់ទំនងត្រីភាគីជាមួយសហរដ្ឋអាមេរិក ក្នុងការឆ្លើយតបទៅនឹងការគំរាមកំហែងផ្នែកយោធា ដែលកំពុងវិវត្តនៅកូរ៉េខាងជើង។
លោក Kishida បានប្រាប់អ្នកយកព័ត៌មាន បន្ទាប់ពីការសន្ទនាតាមទូរស័ព្ទជាមួយលោក Yoon ថា អ្នកទាំងពីរបានយល់ព្រមរក្សាទំនាក់ទំនងជិតស្និទ្ធជុំវិញបញ្ហាកូរ៉េខាងជើង ហើយចែករំលែកទស្សនៈថា ការរៀបចំជំនួបរវាងមេដឹកនាំទាំងពីរកាន់តែឆាប់គឺកាន់តែល្អ។

មន្ត្រីសហរដ្ឋអាមេរិកនិងកូរ៉េខាងត្បូងបាននិយាយកាលពីថ្ងៃសុក្រថា ប្រទេសកូរ៉េខាងជើងថ្មីៗនេះបានប្រើប្រាស់ប្រព័ន្ធមីស៊ីលផ្លោងអន្តរទ្វីប (ICBM) ដ៏ធំបំផុតមិនធ្លាប់មានរបស់ខ្លួននៅក្នុងការបាញ់បង្ហោះសម្ងាត់ចំនួនពីរលើក ដែលសកម្មភាពនេះទំនងជាត្រួសត្រាយផ្លូវសម្រាប់ការបន្តសាកល្បងបាញ់មីស៊ីលរយៈចម្ងាយឆ្ងាយឡើងវិញ។
លោក Kishida បាននិយាយថា ជម្រើសការទូតទាំងអស់គឺបើកចំហរក្នុងការដោះស្រាយជាមួយកូរ៉េខាងជើង រួមទាំងការដាក់ទណ្ឌកម្ម ហើយបានបន្ថែមថា ប្រទេសជប៉ុននឹងរក្សាទំនាក់ទំនងជិតស្និទ្ធជាមួយសហរដ្ឋអាមេរិកនិងកូរ៉េខាងត្បូង ចំពោះការឆ្លើយតបណាមួយ។

អ្នកនាំពាក្យរបស់លោក Yoon ដែលបានឈ្នះការបោះឆ្នោតប្រធានាធិបតីកាលពីថ្ងៃពុធ បាននិយាយថា លោកបានបង្ហាញក្តីសង្ឃឹមសម្រាប់កិច្ចសហប្រតិបត្តិការត្រីភាគី ដែលពាក់ព័ន្ធនឹងសហរដ្ឋអាមេរិកក្នុងការដោះស្រាយបញ្ហាជាមួយកូរ៉េខាងជើង។
គួរបញ្ជាក់ផងដែរថា ទំនាក់ទំនងរវាងប្រទេសជិតខាងទាំងពីរនេះមានភាពតានតឹងដោយបញ្ហាមួយចំនួន ពោលគឺចាប់តាំងពីសម័យអាណានិគមរបស់ជប៉ុនចន្លោះឆ្នាំ១៩១០-១៩៤៥លើឧបទ្វីបកូរ៉េមកម្ល៉េះ។
លោក Kishida បាននិយាយថា ទំនាក់ទំនងទ្វេភាគីរវាងជប៉ុននិងកូរ៉េខាងត្បូងគឺមានភាពចាំបាច់ណាស់ ដើម្បីបោះជំហានទៅមុខក្នុងបរិការពិភពលោក៕