ប្រធានមន្ទីរទេសចរណ៍ខេត្តកោះកុងអំពាវនាវដល់សេវាករទេសចរទាំងអស់ចូលរួមការពារអនាម័យនិងអនុវត្តន៍វិធានការពារជំងឺកូវីដ-១៩ឱ្យបានខ្ជាប់ខ្ជួន

ប្រធានមន្ទីរទេសចរណ៍ខេត្តកោះកុង អំពាវនាវដល់ម្ចាស់បម្រើសេវាកម្មទេសចរទាំងអស់ ចូលរួមការពារអនាម័យ និងអនុវត្តន៍វិធានការពារជំងឺកូវីដ-១៩ ឱ្យបានខ្ជាប់ខ្ជួន ដើម្បីកាត់ផ្តាច់ការចម្លងជំងឺនៅក្នុងសហគមន៍។
លោក សុខ ចន្ទគ្រឹះស្នា ប្រធានមន្ទីរទេសចរណ៍ខេត្តកោះកុងបានឱ្យដឹងថា ខណៈដែលមានភ្ញៀវទេសចរទៅលេងកម្សាន្ត នៅតាមបណ្តារម្មណីយដ្ឋានក្នុងខេត្តនេះ ជាបន្តបន្ទាប់ ដូច្នេះសូមម្ចាស់សេវាកម្ម ដែលបម្រើដល់វិស័យទេសចរណ៍ទាំងអស់ ត្រូវបង្កើនការប្រុងប្រយ័ត្នក្នុងការថែរក្សាអនាម័យ ជាពិសេសនោះគឺការអនុវត្តឱ្យបានខ្ជាប់ខ្ជួននូវវិធានការ របស់ប្រមុខរាជរដ្ឋាភិបាល ក៏ដូចជាក្រសួងសុខាភិបាល ដើម្បីឱ្យភ្ញៀវទេសចរដែលគាត់មកលេងកម្សាន្តមានភាពកក់ក្តៅ សុវត្ថិភាព និងសប្បាយរីករាយមក ម្ដងហើយចង់មកម្តងទៀត។

លោកបានបន្តថា ចំពោះគោលដៅទេសចរណ៍នីមួយៗ អាជ្ញាធរមូលដ្ឋានក៏បានចុះអនុវត្តន៍ស្តង់ដារប្រតិបត្តិអប្បបរមា (SOP) តាមគន្លងនៃប្រក្រតីភាពថ្មី សម្រាប់ប្រភេទអាជីវកម្មទេសចរណ៍ ដូចជា,ការគ្រប់គ្រងចរន្តភ្ញៀវទេសចរ , ការរៀបចំវិធានសុវត្ថិភាពទេសចរណ៍ ក្នុងរមណីយដ្ឋានទេសចរណ៍ , ការធានាសុវត្ថិភាពនិងសុខភាពសាធារណៈ ភ្ញៀវទេសចរ , ការធានាសុវត្ថិភាពនិងសុខភាពសាធារណៈបុគ្គលិកបម្រើការ , ការជំរុញផ្សព្វផ្សាយ វិធានការក្នុងការទប់ស្កាត់ការរីករាលដាលជំងឺកូវីដ-១៩ ដើម្បីធ្វើយ៉ាងណាឱ្យភ្ញៀវទេសចរទៅលេងកម្សាន្តនៅទីនោះមានភាពសប្បាយរីករាយ និងធានាបានសុវត្ថិភាព មិនខ្លាចឆ្លងជំងឺកូវីដ-១៩។

លោកក៏បានអំពាវនាវបន្ថែមថា ៖ ” សូមអំពាវនាវដល់អាជីវករសេវាកម្មទេសចរណ៍ទាំងអស់ក្នុងខេត្ត ឱ្យចូលរួមទាំងអស់គ្នាពាក់ព័ន្ធទៅរឿងវិធានការការពារកូវីដ-១៩ និងចូលរួមសម្អាតទីតាំងរបស់ខ្លួន និងមានភាពរាក់ទាក់ចំពោះភ្ញៀវ ជាពិសេសសូមចូលរួមទាំងអស់គ្នា កុំឱ្យទីតាំងរបស់យើងមានសំរាម ដើម្បីទីក្រុងរបស់យើងស្អាត ខេត្តយើងស្អាត ប្រទេសយើងស្អាត ដើម្បីទាក់ទាញភ្ញៀវទេសចរឱ្យពួកគាត់ចង់មកលេងម្ដងហើយចង់មកម្ដងទៀត។

លោកប្រធានមន្ទីរ ក៏បានអំពាវនាវដល់ភ្ញៀវទេសចរ ដែលទៅលេងកម្សាន្តនៅតាមបណ្តារម្មណីយដ្ឋាននៅក្នុងខេត្តនេះ សូមអនុវត្តទាំងអស់គ្នានូវវិធានការបីការពារបីកុំ ឱ្យបានខ្ជាប់ខ្ជួន ជាមួយគ្នានោះ សូមភ្ញៀវទេសចរមេត្តាជួយទុកដាក់សំរាមឱ្យបានត្រឹមត្រូវ បន្ទាប់ពីបរិភោគរួចរាល់ ដើម្បីឱ្យខេត្តកោះកុងរក្សាបាននូវភាពស្រស់ស្អាត និងពោរពេញទៅដោយខ្យល់អាកាសបរិសុទ្ធ។

សូមបញ្ជាក់ថា ខេត្តកោះកុង ត្រូវបានរាជរដ្ឋាភិបាលទទួលស្គាល់ថា ជាខេត្តអេកូទេសចរណ៍មួយនៃព្រះរាជាណាចក្រកម្ពុជា ដោយសារសម្បូរធនធានធម្មជាតិដ៏ស្រស់ត្រកាលហើយបានក្លាយជារមណីយដ្ឋានទេសចរណ៍ជាច្រើនប្រមាណជាង ២០កន្លែង ដើម្បីទទួលស្វាគមន៍ភ្ញៀវទៅលេងកម្សាន្ត ៕កុសល