លោកវរសេនីយ៍ឯក ជិម សុវណ្ណ ស្នងការរង ទទួលដឹកនាំការិយាល័យនគរបាលចរាចរណ៍ផ្លូវគោក នៃស្នងការ ដ្ឋាននគរបាលខេត្តសៀមរាប បានឲ្យដឹងនៅព្រឹកថ្ងៃទី១៥ខែមីនាឆ្នាំ២០២២នេះ លោកឧត្តមសេនីយ៍ត្រី តេងចាន់ណាត ស្នងការនគរបាលខេត្តសៀមរាប បានសម្រេចបំពាក់បំពង់ពន្លត់អគ្គីភ័យនៅតាមម៉ូតូចល័យ ដែលប្រចាំការនៅតាមគោលដៅនានាក្នុងក្រុងសៀមរាប ។
ដើម្បីជួយសង្គ្រោះបឋមនៅពេលមានអគ្គីភ័យកើតឡើង ជាពិសេសករណីគ្រោះថ្នាក់ចរាចរណ៍ រថយន្តបុកគ្នាបណ្តាលឲ្យមានអគ្គីភ័យ គឺមន្រ្តីនគរបាលចរាចណ៍ ដែលបានទៅដល់គោលដៅកើតហេតុមុនគេ គឺអាចជួយសង្គ្រោះបឋមបានទាន់ពេលវេលា។ លោកបានបន្តថា កន្លងមកពេលមានគ្រោះអគ្គីភ័យតូចតាច ឬគ្រោះថ្នាក់ចរាចណ៍បង្កឲ្យមានអគ្គីភ័យផ្តើមចេញពីតូចមួយតែពេលមន្រ្តីនគរបាលចរាចរណ៍ទៅដល់គោលដៅកើតហេតុមុនគេ បានត្រឹមបញ្ជៀសចរាចរណ៍ប៉ុនណ្ណោះដោយមិនអាចជួយគ្រោះបឋមបាននោះទេដោយសារតែគ្មានឧបករណ៍។
ប៉ុន្តែចាប់ពីពេលនេះទៅ បើមានករណីអគ្គីភ័យក្នុងទំហំតូច ហើយមន្រ្តីនគរបាលចរាចរណ៍បានទៅដល់គោលដៅមុនគឺពួកគាត់អាចជួយគ្រោះទាន់ពេល ។ លោកវរសេនីយ៍ឯកបានបញ្ជាក់ថា សម្រាប់ជំហានដំបូងនេះ គឺបំពាក់បំពង់ពន្លត់អគ្គីភ័យសម្រាប់នគរបាលចរាចរណ៍ផ្លូវគោកចំនួន៧ម៉ូតូ ដោយក្នុងមួយម៉ូតូមានបំពង់ពន្លត់អគ្គីភ័យចំនួន២បំពង់ ។ ហើយនៅពេលខាងមុខយើងគ្រោងបំពាក់ទៅលើម៉ូតូឲ្យបានច្រើនបន្ថែមទៀត ។
ជាមួយគ្នានេះ ដើម្បីឲ្យមន្រ្តីនគរបាលចរាចរណ៍ចេះប្រើប្រាស់បំពង់ពន្លត់អគ្គីភ័យនេះ ឲ្យបានត្រឹមត្រូវតាមបច្ចេកទេស មន្រ្តីជំនាញការិយាល័យនគរបាលបង្ការ ពន្លត់ អគ្គីភ័យ និង សង្គ្រោះ នៃស្នងការដ្ឋាននគរបាលខេត្តសៀមរាប បានមកបង្ហាត់បង្រៀនអំពីរបៀបរក្សាទុកបំពង់ពន្លត់អគ្គីភ័យឲ្យបានត្រឹមត្រូវ របៀបប្រើប្រាស់ឲ្យបានត្រឹមត្រូវ តាមលក្ខណៈបច្ចេកទេស ដោយបានធ្វើហាត់សមជាក់ស្តែងផង ដែរ ។
លោកវរសេនីយ៍ឯក ជិម សុវណ្ណ ក៏បានអំពាវនាវឲ្យប្រជាពលរដ្ឋមានការចូលរួមសហការជាមួយសមត្ថកិច្ចនៅពេលមានករណីគ្រោះថ្នាក់ចរាចរណ៍បង្កឲ្យមានអគ្គីភ័យ ឬឃើញមានអគ្គីភ័យដែលផ្តើមឆេះដំបូងក្នុងទំហំតូចអាចទាក់ ទងមកមន្រ្តីនគរបាលចរាចរណ៍បាន ដែលមានលេខទំនាក់ទំនងនៅតាមគ្រប់បក់ទាំងអស់របស់នគរបាលចរាចរណ៍តាមដងផ្លូវ ។
សូមបញ្ជាក់ថា នេះជាលើកដំបូងហើយដែលនគរបាលចរាចរណ៍ផ្លូវគោកបានបំពាក់បំពង់ពន្លត់អគ្គីភ័យនៅតាមម៉ូតូ ដើម្បីជួយសង្គ្រោះឲ្យបានទាន់ពេលវេលា នៅពេលមានគ្រោះថ្នាក់ចរាចរណ៍បង្កឲ្យមានអគ្គីភ័យ ៕ប៊ុនរិទ្ធី
