(កណ្តាល): បុរសម្នាក់ត្រូវបានសមត្ថកិច្ចក្រុងតាខ្មៅជួយអន្តរាគមន៍នាំយកទៅសង្គ្រោះនៅមន្ទីរពេទ្យភ្លាមៗបន្ទាប់ពីបើកកង់បីឥណ្ឌាឡើងរង្វង់មូលលោកតាខ្មៅហើយផឹកថ្នាំសម្លាប់សត្វល្អិត បំណងសម្លាប់ខ្លួន។
ហេតុការណ៍នេះ បានកើតឡើងកាលពីវេលាម៉ោងប្រមាណ១០មោង១០នាទីព្រឹកថ្ងៃទី២០ មិនា ២០២០ នៅចំណុចរង្វង់មូលលោកតាខ្មៅ ស្ថិតក្នុងភូមិតាខ្មៅ សង្កាត់តាខ្មៅ ក្រុងតាខ្មៅ ខេត្តកណ្ដាល ហើយបុរសនោះ ឈ្មោះស៊្រាង ស៊្រី អាយុ៥១ឆ្នាំ មានស្រុកំណើតនៅស្រុកស្អាង ខេត្តកណ្តាល និងស្នាក់នៅផ្ទះជួលម្តុំមុខសាលាបឋមសិក្សាកំពង់សំណាញ់ ស្ថិតក្នុងភូមិកំពង់សំណាញ់ សង្កាត់កំពង់សំណាញ់ ក្រុងតាខ្មៅ ខេត្តកណ្ដាល មានរបរជាអ្នករត់ផាស់អេប(កង់បីឥណ្ឌា)។
លោកវរៈសេនីយ៍ទោ ភឿង វ៉ាត អធិការរងនគរបាលក្រុងតាខ្មៅ បានឱ្យដឹងថា: នៅមុនពេលកើតហេតុ បុរសខាងលើបានបើកកង់បីឥណ្ឌារបស់ខ្លួន ពីចំណតដែលនៅទល់មុខរង្វង់មូល លោកតាខ្មៅ សំដៅឡើងខឿន ធ្វើឱ្យប្រជាពលរដ្ឋដែលកំពុងសែនព្រេន និងបន់ស្រន់ នៅទីនោះ មានការភ័យខ្លាច រត់ចែកផ្លូវគ្នាស្មានតែជាគ្រោះថ្នាក់ចរាចរណ៍ ប៉ុន្តែផ្ទុយទៅវិញ បុរសនោះបានឈប់ផាស់អេបរបស់ខ្លួន ហើយក៏ទាញដបថ្នាំគីមីសម្លាប់សត្វល្អិត មកបើកគម្របហើយអកផឹក ឃើញដូច្នេះ តាៗដែលនៅមើលថែរក្សានៅទីនោះ ក៏នាំគ្នាស្ទុះចូលទៅឃាត់សួរនាំ បុរសនោះបានប្រាប់យ៉ាងខ្លីថា គាត់ចង់ស្លាប់ ព្រោះពិបាកចិត្តណាស់ រឿងក្នុងគ្រួសារ។
បន្តិចក្រោយមកបុរសនោះក៏បែកពពុះមាត់ ហើយក៏ត្រូវសមត្ថិកិច្ច និងអ្នករត់កង់បី ដូចគ្នា ដឹកយកទៅសង្គ្រោះនៅមន្ទីរពេទ្យបង្អែកជ័យជំនះ នៅពេលនោះដែរគ្រូពេទ្យបានប្រាប់ថា គាត់ផឹកថ្នាំពុលប្រភេទទឹក ( ថ្នាំពុលគីមី ) នេះមានកម្រិតខ្លាំងណាស់ តែទោះជាយ៉ាងណា ពេទ្យនឹងព្យាយាមជួយឱ្យអស់ពីលទ្ធភាព។
បុរសអ្នករត់កង់បីឥណ្ឌាជាមួយគ្នាម្នាក់ បានបង្ហើបឱ្យដឹងថា: លោក ស៊្រាង ស៊្រី មានបញ្ហាក្នុងគ្រួសារ និងបានលែងលះជាមួយប្រពន្ធ ប្រមាណជាង១ខែមកហើយ ហើយមួយរយៈនេះនៅលើផាស់អេបរបស់គាត់មានទាំងកាបូបខោអាវផងដែរ និងតែងសម្រាកនៅលើកង់បី នៅចំណតនេះទាំងយប់ទាំងថ្ងៃ និងតែងរអ៊ូថា: ពិបាកចិត្តខ្លាំងណាស់ ហើយក្រោយកើតហេតុ ពួកគាត់ក៏បានជួយទំនាក់ទំនងទៅកូនៗរបស់គាត់ ឱ្យមកជួយថែមើលឪពុកដែរ៕
