ប្រធានាធិបតីស៊ីរីនិងរដ្ឋមន្ត្រីការបរទេសអ៊ីរ៉ង់ជួបពិភាក្សាគ្នាអំពីកិច្ចព្រមព្រៀងនុយក្លេអ៊ែរឆ្នាំ២០១៥

ទីភ្នាក់ងារសារព័ត៌មានរដ្ឋស៊ីរី SANA បានរាយការណ៍ថាប្រធានាធិបតីស៊ីរីលោក Bashar Assad កាលពីថ្ងៃពុធបានពិភាក្សាអំពីការវិវត្តនៃកិច្ចពិភាក្សាស្តីពីការស្ដារឡើងវិញនូវកិច្ចព្រមព្រៀងនុយក្លេអ៊ែរឆ្នាំ២០១៥ ជាមួយរដ្ឋមន្ត្រីការបរទេសអ៊ីរ៉ង់លោក Hossein Amir Abdollahian ដែលមកធ្វើទស្សនកិច្ចនៅទីក្រុងDamascus។

របាយការណ៍បាននិយាយថាក្នុងអំឡុងពេលនៃកិច្ចប្រជុំនេះ, លោក Assad បាននិយាយថាការឈានដល់កិច្ចព្រមព្រៀងមួយស្តីពីសន្ធិសញ្ញានុយក្លេអ៊ែរគឺមានសារៈសំខាន់ជាងពេលណាៗទាំងអស់សម្រាប់ការបម្រើផលប្រយោជន៍របស់អ៊ីរ៉ង់ និងតុល្យភាពក្នុងតំបន់និងពិភពលោក។

សម្រាប់សមភាគីរបស់គាត់ លោក Amir Abdullahian បានប្រាប់លោក Assad អំពីកិច្ចចរចានុយក្លេអ៊ែរដែលកំពុងបន្ត ដោយនិយាយថា ប្រទេសរបស់គាត់បានធ្វើសំណើស្របតាមសិទ្ធិ និងផលប្រយោជន៍របស់ប្រជាជនអ៊ីរ៉ង់ ហើយការឈានដល់កិច្ចព្រមព្រៀងទាមទារឱ្យលោកខាងលិចបង្ហាញឆន្ទៈយ៉ាងម៉ឺងម៉ាត់ក្នុងការឆ្លើយតបនឹងសំណើ។

ភាគីទាំងពីរក៏បានពិភាក្សាអំពីកិច្ចសហប្រតិបត្តិការទ្វេភាគីក្នុងការប្រយុទ្ធប្រឆាំងនឹងអំពើភេរវកម្មផងដែរ។ លោក Abdollahian បានសង្កត់ធ្ងន់លើតួនាទីរបស់ស៊ីរីក្នុងស្ថិរភាពក្នុងតំបន់ ដោយបានរំលឹកឡើងវិញថា ប្រទេសរបស់លោកនឹងឈរក្បែរស៊ីរី និងប្រជាជនរបស់ខ្លួនរហូតដល់ប្រទេសនេះទទួលបានការគ្រប់គ្រងទឹកដីទាំងអស់ឡើងវិញ៕