មន្ត្រីយោធានៅបញ្ជាការដ្ឋានកងអង្គរក្ស បាញ់ក្រុមចោរស្លាប់ម្នាក់នៅនឹងកន្លែង

ដោយៈចាន់តូ
ភ្នំពេញ ៖ កាលពីព្រឹកទាបភ្លឺវេលាម៉ោង៥នឹង៤៥ថ្ងៃ២៤ខែមិនាឆ្នាំ២០២២ នៅចំណុចផ្លូវ៥០ម៉ែត្រ ក្នុងភូមិពាម សង្កាត់ព្រៃស ខណ្ឌដង្កោ រាជធានីភ្នំពេញ ។ មានករណីបង្កការភ្ញាក់ផ្អើលមួយបានកើតឡើង ខណៈក្រុមចោរមានគ្នាចំនួន ៦នាក់ ជិះម៉ូតូ៣គ្រឿង បានធ្វើសកម្មភាពធាក់ប្លន់យកម៉ូតូពីមន្ត្រីយោធា ម្នាក់កំពុងជិះតាមដងផ្លូវ បានសម្រេច បណ្តាលឲ្យជនរងគ្រោះដួលកាំភ្លើងខ្ទាតទៅម្ខាងទៀតនៃផ្លូវ ខំស្រវ៉េស្រវ៉ា ស្ទុះយកកាំភ្លើងនោះ បាញ់ប្រហារទៅលើចោរ ដែលជិះម៉ូតូរបស់ខ្លួនរត់គេច ប្រមាណ ៩គ្រាប់ បណ្តាលឲ្យស្លាប់ភ្លាមៗទាំងសភាពជិះគងលើម៉ូតូរបស់ជនរងគ្រោះ ដៃកាន់ចង្កូត ម៉ូតូ ភ្លាមៗតែម្តង។

តាមរបាយការណ៍លម្អិតរបស់សមត្ថកិច្ចនគរបាលខណ្ឌដង្កោដែលកាសែតរស្មីកម្ពុជាទទួល បានៗឲ្យដឹងថា ជនរងគ្រោះមានឈ្មោះ ឡាំ ប៊ុនលាង ភេទប្រុស អាយុ៤៨ឆ្នាំ មុខរបរ យោធា នៅ បញ្ជាការដ្ឋានអង្គរក្ស ស្នាក់នៅ ផ្ទះលេខ៩៣៤ ភូមិថ្មគោល២ សង្កាត់ចោមចៅ ខណ្ឌពោធិ៍សែនជ័យ ជិះម៉ូតូម៉ាក HONDA C១២៥ស៊េរី២០២២ ពណ៌ខ្មៅ ពាក់ស្លាក ភ្នំពេញ1JC-4840 ប្រើប្រាស់អាវុធម៉ាក GLOCK-19 ពណ៌ខ្មៅ លេខ BGDR-536 ។
សពជនសង្ស័យមានឈ្មោះ ហា ប្រុស អាយុ១៩ឆ្នាំមុខរបរមិនពិតប្រាកដ (ស្លាប់នៅកន្លែងកើតហេតុ)ស្នាក់នៅផ្ទះ២៦៤E-3Z ផ្លូវ២១៧ ភូមិ៥ សង្កាត់អូឬស្សី២ ខណ្ឌ៧មករា រាជធានីភ្នំពេញ។ មានស្រុកកំណើតភូមិអំពិលព្រៃ ស្រុកកណ្ដាលស្ទឹង ខេត្តកណ្ដាល។ចំណែកការធ្វើកោសល្យវិច័យនៅទីតាំងកើតហេតុ រកឃើញសំបកកាទុះចំនួន០៩គ្រាប់ ហើយការធ្វើកោសល្យវិច័យទៅលើសពជនសង្ស័យ មានស្លាកស្នាមត្រូវគ្រាប់កាំភ្លើងចំនួន០៦គ្រាប់លើដងខ្លួន ។

បើតាមការសាកសួរទៅលើជនរងគ្រោះ របស់សមត្ថកិច្ចបានឲ្យដឹងថា មុនពេលកើតហេតុ ជនរងគ្រោះបានជិះម៉ូតូ០១គ្រឿងម៉ាកHONDA C125 ខាងលើចេញពីផ្ទះនៅភូមិថ្មគោល២ ដើម្បីទៅលេងប្អូនជីដូនមួយ ឈ្មោះ ប្រាក់ សំអាត អាយុ៤០ឆ្នាំ មានទីលំនៅ ក្រុងតាខ្មៅ ខេត្តកណ្តាល ដោយធ្វើដំណើរតាមផ្លូវ៥០ម៉ែត្រ ពីលិចទៅកើត មកដល់ចំណុចកើតហេតុស្ថិតក្នុងភូមិពាម សង្កាត់ព្រៃស ខណ្ឌដង្កោ ស្រាប់តែលេចមុខជនសង្ស័យមួយក្រុមមានគ្នាចំនួន០៦នាក់ ជិះម៉ូតូចំនួន០៣គ្រឿង ម៉ាក HONDA C125 មិនចាំស្លាកលេខ ជិះស្របជាមួយម៉ូតូជនរងគ្រោះ រួចក្រុមជនសង្ស័យបានធាក់ម៉ូតូជនរងគ្រោះឲ្យដួលទៅលើចិញ្ជើមផ្លូវរួចធ្វើសកម្មភាពវាយ និង ធាក់ក្បាលជនរងគ្រោះ បណ្តាលឲ្យរងរបួសដៃ ហើមជង្គង់ ឈឺចុកចាប់ពេញខ្លួននិងជ្រុះអាវុធខ្លី GLOCK-19 ចេញពីចង្កេះរួចជនសង្ស័យម្នាក់បានចុះលើកម៉ូតូរបស់ជនរងគ្រោះ ជិះគេចខ្លួនទៅទិសខាងកើតចំងាយប្រហែល៥ម៉ែត្រ ជនរងគ្រោះក៏ដើរទៅរើសយកអាវុធខាងលើ បាញ់គម្រាមជនសង្ស័យឲ្យឈប់ក៏បណ្តាលឲ្យត្រូវជនសង្ស័យម្នាក់ស្លាប់ ។ ចំណែកបក្សពួកជនសង្ស័យផ្សេងទៀតរត់គេចខ្លួនបាត់ស្រមោល ទើបជនរងគ្រោះ មកដាក់ពាក្យបណ្តឹងនៅអធិការដ្ឋាននគរបាលខណ្ឌដង្កោតែម្តង ។

បច្ចុប្បន្ន មន្ត្រីយោធាកងអង្គរក្ស ឯកឧត្តមព្រះរាជអាជ្ញាអនុញ្ញាតអោយអង្គភាពធានាត្រឡប់ទៅបំរើការងារអង្គភាពវិញជាណ្ដោះអាសន្ន ដកហូតរក្សាទុកវត្ថុតាង អាវុធខ្លី ម៉ាកGLOCK-19មួយដើមនឹងម៉ូតូមួយគ្រឿង។ ចំណែកសពជនសង្ស័យត្រូវបានប្រគល់អោយឪពុកម្ដាយទទួលយកធ្វើបុណ្យតាមប្រពៃណីនៅវត្តឬស្សីសាញ់៕