ដោយ រតនា
ភ្នំពេញ៖ លោក ជា ពិសី អភិបាលខណ្ឌទួលគោកបានណែនាំអោយកងកម្លាំងមានសមត្ថកិច្ចនិងអាជ្ញាធរខណ្ឌ សង្កាត់ទាំងអស់ត្រូវលាងដៃអោយស្អាតជាមួយនិងល្បែងស៊ីសងគ្រប់ប្រភេទនៅក្នុងមូលដ្ឋានរបស់ខ្លួន ព្រោះថាល្បែងស៊ីសងនេះហើយ ជាដើមចម បង្កអោយមានបទល្មើសជាច្រើននៅក្នុងសង្គម។
ការណែនាំបែបនេះរបស់លោក ជា ពិសី បានធ្វើឡើងនៅក្នុងកិច្ចប្រជុំសាមញ្ញលើកទី៣៤ របស់ក្រុមប្រឹក្សាខណ្ឌទួលគោក នាព្រឹកថ្ងៃទី៣០ មីនាឆ្នាំ២០២២នេះ នៅសាលាខណ្ឌទួលគោក ក្រោមវត្តមានលោកម៉ែន សិរី ប្រធានក្រុមប្រឹក្សាខណ្ឌ ,សមាជិកក្រុមប្រឹក្សា និងមានការចូលរួមពីមន្ត្រីក្រោមឱវាទជាច្រើនរូបទៀត។
លោក ជា ពិសី បានមានប្រសាសន៍លើកឡើងថា ឯកឧត្តម ឃួង ស្រេង អភិបាលនៃគណៈអភិបាលរាជធានីភ្នំពេញធ្លាប់បានមានប្រសាសន៍លើកឡើងជាច្រើនលើករួចមកហើយថា សម្រាប់កងកម្លាំងមានសមត្ថកិច្ចនិងអាជ្ញាធរ ត្រូវតែលាងដៃអោយស្អាតជាមួយនិងល្បែងស៊ីសងគ្រប់ប្រភេទនៅក្នុងមូលដ្ឋានរបស់ខ្លួន ព្រោះថា ល្បែងស៊ីសងនេះហើយជាដើមចមនៃបទល្មើសជាច្រើន ដូចជាអំពើហឹង្សា ក្នុងគ្រួសារ អំពើចោរកម្មជាដើម ។ ដូច្នេះ ក្នុងនាមអាជ្ញាធរមានសមត្ថកិច្ចទាំងអស់ ត្រូវតែបង្ក្រាបល្បែងស៊ី សងគ្រប់ប្រភេទ អោយអស់ពីក្នុងមូលដ្ឋានរបស់ខ្លួន ដើម្បីទទួលបានការជឿទុកចិត្តពីប្រជាពលរដ្ឋ៕
