សហរដ្ឋអាមេរិកនិងកូរ៉េខាងត្បូងចាប់ផ្តើមធ្វើសមយុទ្ធយោធាឡើងវិញ ខណៈភាពតានតឹងនៅកូរ៉េខាងជើងកើនឡើង

សមយុទ្ធយោធារួមគ្នារបស់កូរ៉េខាងត្បូងនិងសហរដ្ឋអាមេរិក ដែលគ្រោងនឹងចាប់ផ្តើមនៅខែក្រោយ អាចជាលើកដំបូងក្នុងរយៈពេលប៉ុន្មានឆ្នាំចុងក្រោយនេះ រួមមានទាំងសព្វាវុធ និងកងទ័ពកាន់តែច្រើន និងជាការផ្ញើសារ ខណៈពេលដែលភាពតានតឹងជាមួយកូរ៉េខាងជើងកំពុងកើនឡើង។

ក្រុមអ្នកវិភាគបាននិយាយថា ទាំងយោធាកូរ៉េខាងត្បូង ឬសហរដ្ឋអាមេរិកមិនបានបញ្ជាក់ពីអ្វីដែលសមយុទ្ធប្រចាំឆ្នាំនៅឆ្នាំនេះអាចរួមបញ្ចូលនោះទេ ប៉ុន្តែថ្មីៗនេះ ការបង្ហាញកម្លាំងយោធាមិនធម្មតានៅក្នុងនិងជុំវិញឧបទ្វីបកូរ៉េបានបង្ហាញថា ការបង្ហាញសាច់ដុំអាចនឹងនៅតែធ្វើឡើង។

កូរ៉េខាងជើងបានធ្វើតេស្តមីស៊ីលផ្លោងអន្តរទ្វីប (ICBM) ជាលើកដំបូងចាប់តាំងពីឆ្នាំ២០១៧ កាលពីសប្តាហ៍មុន ហើយមន្ត្រីកូរ៉េខាងត្បូងបានរាយការណ៍ថាមានការសាងសង់ថ្មីមួយនៅឯកន្លែងសាកល្បងនុយក្លេអ៊ែរតែមួយគត់របស់កូរ៉េខាងជើងដែលត្រូវបានបិទនៅឆ្នាំ២០១៨។ក្រុមអ្នកឃ្លាំមើលនៅក្នុងសហរដ្ឋអាមេរិកក៏បានរាយការណ៍ផងដែរនៅក្នុងសប្តាហ៍នេះនូវសកម្មភាព “មិនធម្មតា” ដោយនាវាមុជទឹកបាញ់មីស៊ីលផ្លោងរបស់កូរ៉េខាងជើងស្ថិតនៅឯមូលដ្ឋានរបស់ខ្លួន ដែលទំនងជាអាចជួសជុល ការកែប្រែ ឬការរៀបចំសម្រាប់ការបាញ់មីស៊ីលថ្មី។

គួរបញ្ជាក់ផងដែរថា កូរ៉េខាងត្បូងបានធ្វើសមយុទ្ធមីស៊ីលដ៏កម្រ និងការបង្ហាញយន្តហោះចម្បាំង F-35A ដែលមិនធ្លាប់មានពីមុនមក ក្នុងការឆ្លើយតបយ៉ាងច្បាស់លាស់ចំពោះការសាកល្បង ICBM ចុងក្រោយរបស់កូរ៉េខាងជើង ដោយព្រមានទីក្រុងព្យុងយ៉ាងថា ខ្លួនមានឆន្ទៈ និងសមត្ថភាពក្នុងការឆ្លើយតប និង “ដាក់ទណ្ឌកម្ម” កូរ៉េខាងជើងប្រសិនបើចាំបាច់៕