ដោយ រតនា
ភ្នំពេញ៖ ស្នូរគ្រាប់កាំភ្លើងផ្ទុះឡើងជាច្រើនគ្រាប់ បង្កឡើងដោយជនជាតិចិនមួយក្រុម ជិះរថយន្តចំនួន ៥គ្រឿង បានដកកាំភ្លើងបាញ់សំដៅទៅលើបុរសជនជាតិចិនម្នាក់ បណ្តាលឲ្យរងរបួសធ្ងន់ ។
ហេតុការណ៍នេះ បានកើតឡើងកាលពីវេលាម៉ោងជាង ៧ព្រឹក ថ្ងៃទី០៤ ខែមេសា ឆ្នាំ២០២២ នេះ ស្ថិតនៅចំណុចផ្លូវលេខ២២២ កែងនឹងផ្លូវ៥៥ សង្កាត់បឹងរាំង ខណ្ឌដូនពេញ រាជធានីភ្នំពេញ ។
តាមប្រភពព័ត៌មានពីកន្លែងកើតហេតុបានឱ្យដឹងថា មុនពេលផ្ទុះអាវុធ គេឃើញជនរងគ្រោះស្ថិតនៅចំណុចមុខខុនដូ ក្បែរកន្លែងកើតហេតុ ។ លុះមួយសន្ទុះក្រោយមក ស្រាប់តែមានជនជាតិចិនមួយក្រុមជិះរថយន្តចំនួន ៥គ្រឿង បានបើកមកចតមុខខុនដូខាងលើ ហើយបានចុះពីលើរថយន្តរូចដកកាំភ្លើងខ្លីបាញ់ជាច្រើនគ្រាប់សំដៅមកលើជនរងគ្រោះ បណ្តាលឱ្យចំមួយគ្រាប់ឲ្យរងរបួស ត្រូវបានបញ្ជូនទៅកាន់មន្ទីរពេទ្យភ្លាមៗដើម្បីធ្វើការសង្រ្គោះ ចំណែកក្រុមជនជាតិចិនមួយក្រុមដែលប្រដាប់ដោយអាវុធបានបើករថយន្តចេញពីកន្លែងកើតហេតុរត់គេចខ្លួនបាត់ដោយសុវត្ថិភាព ។
ក្រោយពេលកើតហេតុ សមត្ថកិច្ចជំនាញ បានចុះទៅហ៊ុមព័ទ្ធទីតាំងខាងលើ និងបើកពិនិត្យតាមកាមេរ៉ាសុត្ថិភាព ដើម្បីស្រាវជ្រាវចាប់ខ្លួនជនសង្ស័យយកមកផ្តន្ទាទោសតាមផ្លូវច្បាប់ ។ពាក់ព័ន្ធនឹងករណីនេះ សមត្ថកិច្ចនៅមិនទាន់បានបញ្ជាក់ថា ផ្តើមចេញពីរឿងអ្វីនោះទេ ខណៈដែលសមត្ថកិច្ចជំនាញកំពុងតែបន្តការស្រាវជ្រាវ ៕
