ប្រជាពលរដ្ឋរស់នៅលើខ្នងភ្នំគូលែន ខេត្តសៀមរាប ភាគច្រើនពឹងអាស្រ័យលើផលអនុផលព្រៃឈើ ទៅតាមរដូវកាលនីមួយៗ ដោយចាប់ផ្តើមពីខែមីនានេះតទៅ ពួកគាត់កំពុងរីករាយនឹងការប្រមូលផ្លែឈើព្រៃ ដូចជា ផ្លែគុយ ភ្ញៀវ គូលេន និង សិរមាន់ លក់ជូនភ្ញៀវទេសចរជាតិ អន្តរជាតិដែលទៅលេងកម្សាន្ត ។
តាមការបញ្ជាក់ពីបងប្អូនប្រជាពលរដ្ឋ បានឲ្យដឹងថា សព្វថ្ងៃនេះប្រជាពលរដ្ឋដែលរស់នៅលើខ្នងភ្នំគូលែន មិនអាចប្រកបរបរធ្វើស្រែចម្ការបានឡើយ មានតែពឹងអាស្រ័យលើអនុផលព្រៃឈើ ដូចជា រកឃ្មុំ ដកផ្សិត បោចវល្លិ ផ្តៅ ជីក ទំពាំង , ដេរស្លឹកនិងបេះផ្លែឈើព្រៃទៅតាមរដូវកាលនីមួយៗ ។ ម៉្យាងទៀត ផ្លែឈើព្រៃមួយចំនួនដូចជា ផ្លែគុយ ភ្ញៀវ សិរមាន់ និង ផ្លែគូលេន បានចាប់ផ្តើមទុំ ពីខែមីនា រហូតដល់ខែមិថុនា ដូច្នេះប្រជាសហគមន៍ ពួកគាត់តែងតែនាំគ្នាទៅបេះអនុផលព្រៃឈើទាំងនោះ មកបរិភោគ និងសម្រាប់លក់ ដើម្បីយកប្រាក់មកផ្គត់ផ្គង់ការចំណាយក្នុងគ្រួសារ ។ ព្រៃឈើនៅលើភ្នំគូលែន ពិតជាមានសារសំខាន់សម្រាប់ប្រជាពលរដ្ឋរស់នៅទីនេះ ព្រោះថាមួយឆ្នាំៗ ពួកគាត់មិនមានមុខរបរណាផ្សេង ក្រៅពីពឹងអាស្រ័យលើអនុផលព្រៃឈើនិងរួមគ្នាថែរក្សាព្រៃឈើនៅទីនោះឡើយ ។
ដោយពួកគាត់មិនបានធ្វើស្រែ តែគាត់អាស្រ័យធ្វើស្រូវចម្ការ តែទទួលផលតិច ទើមមានតែមុខរបរនេះឯង ចិញ្ចឹមជីវិតពួកគាត់បាន ។ ដូច្នេះក្នុងខែនេះមានរដូវផ្លែឈើ បានបង្កលក្ខណៈឲ្យពួកគាត់បេះគុយខ្លះ គូលែន ភ្ញៀវខ្លះ ដឹកយកទៅលក់គេដល់បន្ទាយស្រី ឬ ដាក់ម៉ូយ មួយគីឡូបានជាង១ម៉ឺនរៀល វាទុំច្រើនបានច្រើន មួយថ្ងៃ៥០ទៅ៦០គីឡូក្រាម តាមតែវាមិនទាន់ទុំវាមានប្រយោជន៍ដែរ ព្រោះថាផ្លែឈើនៅទីនេះវាគ្មានជាតិគីមីទេ គឺផ្លែទៅតាមធម្មជាតិវា ហើយភ្ញៀវដែលបានមកកម្សាន្តលើខ្នងភ្នំ ក៏ចូលចិត្តទិញផងដែរ និង បានផ្តល់ផលប្រយោជន៍ បានស្លឹកដេរផង មានផ្តៅរួមផ្សំ មានផ្លែឈើផង វាផ្តល់ឲ្យការផ្គត់ផ្គង់ក្រុមគ្រួសារច្រើនផងដែរ ។
សូមជម្រាបផងដែរថា ចាប់ផ្តើមពីអំឡុងខែមីនា នៅរៀងរាល់ឆ្នាំ ផ្លែឈើព្រៃមួយចំនួន រួមមាន ផ្លែគុយ ភ្លៀវ សិរមាន់ និងគូលែនជាដើម ត្រូវបានប្រជាពលរដ្ឋ រស់នៅលើខ្នងភ្នំគូលែន និង បងប្អូនរស់នៅតំបន់អង្គរ និយមចូលទៅរកបេះផ្លែឈើព្រៃទាំងនោះ យកមកបរិភោគ និង លក់ដូរទៅកាន់ទីផ្សារជាដើម ។ ក្នុងឱកាសបុណ្យចូលឆ្នាំថ្មីខាងមុខនេះ បងប្អូនដែលបានចូលមកកម្សាន្តនៅលើទឹកដីអច្ឆរយៈអង្គរ សូមកុំភ្លេចជួយជាវ ផ្លែឈើព្រៃលើទឹកដីអង្គរ ក្នុងការចូលរួមកាត់បន្ថយភាពក្រីក្ររបស់ប្រជាពលរដ្ឋ ក្នុងការលើកស្ទួយជីវភាពគ្រួសារពួកគាត់ផងដែរ ។ ដូច្នេះយើងគ្រប់គ្នា ត្រូវបង្កើតស្មារតីចូលរួម ក្នុងការថែរក្សាបរិស្ថានធម្មជាតិ ព្រៃឈើបាននោះ យើងមិនខ្វះអ្វីឡើយទៅតាមរដូវកាល ៕
ប៊ុនរិទ្ធី
